थेंब थेंब साठवूया..महाअभियानाचे शिलेदार होऊया..!
माती आणि पाणी निसर्गाच्या या दोन अनमोल देणग्या म्हणजे केवळ नैसर्गिक संपत्ती नाही, तर उद्याच्या पिढीच्या अस्तित्वाचा तो भक्कम पाया आहे. आज खालावत चाललेली भूजल पातळी आणि सतत डोक्यावर घिरट्या घालणारे पाणी टंचाईचे संकट, यावर केवळ चिंता व्यक्त करून भागणार नाही; तर आता प्रत्येकाने उंबरठा ओलांडून प्रत्यक्ष कृती करण्याची वेळ आली आहे. ”पाणी अडवा, पाणी जिरवा” हा विचार आता केवळ भिंतीवरची घोषणा न राहता, तो आपल्या दैनंदिन जगण्याचा श्वास बनायला हवा. याच उदात्त हेतूने महाराष्ट्रात १५ ते २१ ऑगस्ट दरम्यान ‘जलसंधारण सप्ताह’ आणि २६ जानेवारीपर्यंत चालणारे व्यापक ‘जलसंधारण अभियान’ राबवले जात आहे. आपल्या गावाला, शहराला आणि पर्यायाने संपूर्ण राज्याला दुष्काळाच्या शापातून मुक्त करण्यासाठी, चला… या महाअभियानाचे शिलेदार होऊया!
२१ ऑगस्ट: ‘महा वॉकेथॉन’ – पाण्यासाठी उचलूया एक पाऊल
२१ ऑगस्ट रोजी ‘जलसंधारण दिना’चे औचित्य साधून राज्यातील सर्व ३६ जिल्ह्यांमध्ये “महा वॉकेथॉन – वॉक फॉर वॉटर” या महाफेरीचे आयोजन करण्यात आले आहे.
नुसती चाल नाही, हा तर संकल्प आहे: १५ वर्षे व त्यापुढील प्रत्येक नागरिकासाठी ही केवळ ३ किलोमीटरची चालण्याची स्पर्धा नसून, जलरक्षणाची सामूहिक शपथ आहे.
मिळणारा सन्मान: या जनक्रांतीत सहभागी होणाऱ्या प्रत्येक पाऊलाचा सन्मान टी-शर्ट, कॅप, डिजिटल ई-प्रमाणपत्र आणि छातीवर अभिमानाने मिरवता येईल अशा ‘मी जलदूत’ बॅजने केला जाणार आहे. पाण्याचा प्रत्येक थेंब जपण्याचा संदेश घराघरांत पोहोचवण्यासाठी या महाफेरीत नक्की सहभागी व्हा.
तरुणाईच्या कल्पकतेला आव्हान: राज्यव्यापी ‘रील्स’ स्पर्धा
सोशल मीडियाच्या ताकदीचा निसर्ग संवर्धनासाठी वापर करण्याची एक उत्तम संधी तरुणाईच्या दारात चालून आली आहे. १५ ते ३० वर्षे वयोगटातील युवक-युवतींसाठी ‘Reel for Soil and Water Conservation’ ही स्पर्धा आयोजित करण्यात आली आहे.
काय करायचे आहे? माती व जलसंधारण, पावसाच्या पाण्याचे संकलन (Rainwater Harvesting), वृक्षारोपण किंवा गावातील यशस्वी जलकामे यापैकी कोणत्याही विषयावर ३० ते ६० सेकंदांची एक प्रभावी आणि कल्पक इन्स्टाग्राम (Instagram) रील तयार करा.
हॅशटॅग: सदर रील #SaveSoilSaveWater या अधिकृत हॅशटॅगसह पोस्ट करणे अनिवार्य आहे.
आकर्षक बक्षिसे: जिल्हास्तरावर प्रथम क्रमांकाला ₹२५,०००, द्वितीय ₹१५,००० आणि तृतीय क्रमांकाला ₹१०,००० रोख रकमेचे बक्षीस दिले जाईल. सोबतच ‘महाराष्ट्र युवा जलदूत’ हा बहुमानही प्राप्त होईल!
तुमचा खारीचा वाटा काय असू शकतो?
जलसंवर्धन ही केवळ शासनाची जबाबदारी नाही, ती प्रत्येकाची जनचळवळ बनली पाहिजे.
आपल्या परिसरातील तलाव, विहिरी आणि नाल्यांची श्रमदानातून स्वच्छता करा.
‘एक पेड माँ के नाम’ या मोहिमेअंतर्गत एक तरी झाड लावा आणि ते पोटच्या गोळ्यासारखे जगवा.
घरात, दारात, शेतात पाण्याचा अत्यंत काटकसरीने वापर करा.
शाळा आणि महाविद्यालयांनी निबंध व चित्रकला स्पर्धांसोबतच ‘एक शाळा – एक शोषखड्डा’ हा अत्यंत प्रभावी उपक्रम राबवून या अभियानात आपले अमूल्य योगदान द्यावे.
पालकमंत्री डाॕ उदय सामंत आणि जिल्हाधिकारी मनुज जिंदल यांनी सर्व नागरिकांना या चळवळीत हिरिरीने सहभागी होण्याचे भावनिक आवाहन केले आहे.
”माती वाचवा, पाणी जपा, सुरक्षित भविष्य घडवा”
हा मूलमंत्र अंगीकारून आजच आपली नोंदणी करा आणि एका समृद्ध महाराष्ट्राच्या निर्मितीचे साक्षीदार व्हा!
नोंदणीसाठी लिंक: https://register.mahaevent.co.in/#/register
– प्रशांत कुसुम आनंदराव सातपुते
जिल्हा माहिती अधिकारी, रत्नागिरी
