ढोल-ताशांचा गजर अन् रेड कार्पेटवर पुष्पवृष्टीसनईच्या सुरात पटवर्धन हायस्कूलमध्ये नवागतांचे अभूतपूर्व जल्लोषात स्वागत
रत्नागिरी : भारत शिक्षण मंडळाच्या पटवर्धन हायस्कूलमध्ये १५ जून रोजी नवीन शैक्षणिक वर्षाच्या पहिल्या दिवशी प्रवेश करणाऱ्या नवीन विद्यार्थ्यांचे अतिशय उत्साही, कौतुकास्पद आणि जल्लोषात स्वागत करण्यात आले. शाळेचा पहिला दिवस म्हणजे विद्यार्थ्यांच्या आयुष्यातील एक अत्यंत महत्त्वाचा टप्पा, हाच दिवस अधिक संस्मरणीय आणि आनंददायी करण्यासाठी प्रशालेने जय्यत तयारी केली होती.
या भव्य स्वागत सोहळ्याप्रसंगी विविध क्षेत्रातील मान्यवरांची उपस्थिती विशेष उल्लेखनीय ठरली. यामध्ये भारत शिक्षण मंडळाचे कार्यवाह धनेश रायकर, सहकार्यवाह श्रीकृष्ण दळी, विश्वस्त श्री. घवाळी, भारत शिक्षण मंडळाचे सदस्य श्री. मोहिते, पटवर्धन हायस्कूलच्या मुख्याध्यापिका श्रीमती जानकी घाटविलकर, उपमुख्याध्यापक रूपेश पंगेरकर, पर्यवेक्षक अमर लवंदे तसेच पर्यवेक्षिका श्रीमती शिरोळकर उपस्थित होत्या.
या सर्व मान्यवरांनी उपस्थित राहून नवीन विद्यार्थ्यांचे मनोधैर्य वाढवले व त्यांना भावी शैक्षणिक प्रवासासाठी शुभेच्छा दिल्या.
यावेळी शाळेचा परिसर पूर्णपणे उत्सवी रंगात न्हाऊन निघाला होता. नवीन विद्यार्थ्यांचे स्वागत करण्यासाठी शाळेच्या भव्य प्रांगणात आणि प्रवेशद्वाराजवळ शिक्षक व विद्यार्थ्यांनी मिळून अत्यंत आकर्षक अशी सडा रांगोळी आणि सुबक स्वागताची रांगोळी काढली होती.
नवागतांच्या स्वागतासाठी उत्कृष्ट फलक लेखन करण्यात आले होते. मुख्य प्रवेशद्वारापाशी सुंदर फुग्यांची कमान उभारण्यात आली होती, जी सर्वांचे लक्ष वेधून घेत होती.
आजचा सकाळचा प्रहर सनईच्या मंजूळ सुरांनी मंगलमय झाला होता. त्यातच बालदोस्तांचे स्वागत ढोल-ताशांच्या पारंपरिक व दणदणीत गजरात मिरवणूक काढून करण्यात आले. मुख्य प्रवेशद्वारावर विद्यार्थ्यांसाठी ‘लाल गालीचा’ (रेड कार्पेट) अंथरण्यात आला होता, ज्यावरून चालताना प्रत्येक विद्यार्थ्याच्या चेहऱ्यावर एक वेगळाच आनंद आणि अभिमान झळकत होता. त्यावर सातत्याने पुष्पवृष्टी देखील केली जात होती.
विद्यार्थ्यांनी प्रवेश करताच उपस्थित शिक्षक आणि शिक्षिकांनी अत्यंत आपुलकीने त्यांचे औक्षण केले, कपाळावर टिळा लावला आणि तोंड गोड करण्यासाठी पेढा भरवला. या शाही आणि मायेच्या स्वागताने चिमुरड्या विद्यार्थ्यांचा नवीन शाळेविषयीचा भीतीचा भाव कुठल्या कुठे पळून गेला. या संपूर्ण सोहळ्यासाठी केवळ शिक्षक वर्गच नव्हे, तर पालक वर्गही अतिशय मोठ्या संख्येने उपस्थित होता. आपल्या पाल्यांचे असे थाटात स्वागत होताना पाहून पालकांच्या डोळ्यांत कौतुकाचे आणि आनंदाचे अश्रू तरळले.
सर्व मान्यवरांनी आपल्या मार्गदर्शनात विद्यार्थ्यांना नियमित अभ्यास, उत्तम शिस्त आणि सुसंस्कारांचे महत्त्व पटवून दिले. एकंदरीत, सनईचे सूर, ढोल-ताशांचा गजर आणि रांगोळ्यांच्या थाटात पटवर्धन हायस्कूलमधील शैक्षणिक वर्षाचा हा पहिला दिवस अत्यंत उत्साहपूर्ण, जल्लोषी आणि आनंददायी वातावरणात पार पडला. विद्यार्थ्यांनी मोठ्या आनंदाने आणि नव्या उमेदीने शाळेच्या पहिल्या दिवसाचा हा सुंदर अनुभव आपल्या मनात साठवून ठेवला.
