रामपूर येथे गुहागर-विजापूर मार्गावरील खड्डे बुजविण्यासाठी माजी लोकप्रतिनिधींसह ग्रामस्थ सरसावले

चिपळूण, ता. २० : चिपळूण तालुक्यातील रामपूर येथे गुहागर-विजापूर मार्गावर पडलेल्या खड्ड्यांमुळे वाहनचालकांना होणारा त्रास कमी करण्यासाठी माजी लोकप्रतिनिधींसह स्थानिक नागरिकांनी पुढाकार घेतला. माजी सभापती जितेंद्र चव्हाण, माजी जिल्हा परिषद सदस्य महेश कातकर, माजी पंचायत समिती सदस्य अनुजा चव्हाण यांच्यासह अनुदत्त हॉटेलचे मालक दीपक शेठ शिरकर, दत्ताराम गावडे आदींनी प्रत्यक्ष रस्त्यावर उतरून खड्डे बुजविण्याचे काम केले.

गुहागर-विजापूर हा मार्ग परिसरातील नागरिकांच्या दळणवळणाच्या दृष्टीने महत्त्वाचा आहे. या मार्गावर रामपूर परिसरात ठिकठिकाणी खड्डे पडल्याने वाहनचालकांना वाहन चालविताना अडचणींचा सामना करावा लागत होता. खड्ड्यांमुळे वाहनांचे नुकसान होण्याची शक्यता असून, अपघाताचा धोकाही निर्माण होत आहे. विशेषतः दुचाकीस्वारांना या खड्ड्यांचा अधिक त्रास सहन करावा लागत आहे.

या पार्श्वभूमीवर केवळ संबंधित यंत्रणेकडून दुरुस्तीची वाट न पाहता, नागरिकांना दिलासा देण्यासाठी माजी लोकप्रतिनिधी आणि स्थानिकांनी स्वतः पुढाकार घेतला. रामपूर येथील गुहागर-विजापूर मार्गावरील खड्डे बुजविण्याचे काम हाती घेण्यात आले. या उपक्रमात माजी सभापती जितेंद्र चव्हाण, माजी जिल्हा परिषद सदस्य महेश कातकर, माजी पंचायत समिती सदस्य अनुजा चव्हाण, दीपक शेठ शिरकर, दत्ताराम गावडे यांच्यासह अन्य स्थानिक सहभागी झाले.

तात्पुरत्या उपायाऐवजी कायमस्वरूपी दुरुस्तीची अपेक्षा

रस्त्यावरील खड्डे बुजविण्यासाठी स्थानिकांनी घेतलेल्या पुढाकारामुळे वाहनचालकांना काही प्रमाणात दिलासा मिळण्याची अपेक्षा आहे. मात्र, खड्डे बुजविण्याबरोबरच या मार्गाची कायमस्वरूपी आणि दर्जेदार दुरुस्ती होणे आवश्यक आहे. संबंधित सार्वजनिक बांधकाम विभागाने या मार्गाची पाहणी करून खड्ड्यांची समस्या कायमची दूर करावी, अशी अपेक्षा परिसरातील नागरिकांकडून व्यक्त होत आहे.