रत्नागिरीत मतमोजणीवेळी वाहतूक बदल
- ३ डिसेंबरला सकाळी ७ ते दुपारी ४ पर्यंत मार्ग बंद
- पर्यायी मार्गाचा अवलंब करण्याचे पोलिसांचे आवाहन
रत्नागिरी : नगरपालिका सार्वत्रिक निवडणुकीची मतमोजणी प्रक्रिया मंगळवारी (३ डिसेंबर) होणार असून या दिवशी नगरपालिका परिसरात मोठी गर्दी होण्याची शक्यता वर्तविण्यात आली आहे. अपक्ष तसेच विविध राजकीय पक्षांचे उमेदवार, पदाधिकारी, कार्यकर्ते आणि निकाल ऐकण्यासाठी एकत्र होणारी नागरिकांची गर्दी यामुळे वाहतूक कोंडी तसेच कायदा व सुव्यवस्थेचा प्रश्न निर्माण होऊ नये, यासाठी जिल्हा पोलिसांनी वाहतूक नियंत्रणाची अधिसूचना जारी केली आहे.
पोलीस अधीक्षक नितीन बगाटे यांनी महाराष्ट्र पोलीस कायदा कलम ३४ आणि मोटार वाहन कायदा १९८८ अंतर्गत मिळालेल्या अधिकारांचा वापर करून तात्पुरते वाहतूक निर्बंध लागू केले आहेत. ही अधिसूचना ३ डिसेंबर रोजी सकाळी ७ ते दुपारी ४ या वेळेत लागू राहील.
जेल नाका, रत्नागिरी ते जिल्हाधिकारी कार्यालय गेट क्रमांक २ या दिशेने जाणारा रस्ता या मार्गावरील एकमार्गी वाहतूक बंद असून, त्यासाठी जेल नाका – लाला कॉम्प्लेक्स – गीता भवन – जयस्तंभ असा पर्यायी मार्गाचा अवलंब करायचा आहे.
या वाहतूक बंदीमधून पोलीस वाहने, फायर ब्रिगेड, रुग्णवाहिका, शासकीय वाहने तसेच मंत्र्यांच्या दौऱ्यातील अधिकृत वाहने यांना सूट देण्यात आली आहे. कोणत्याही निकडीनुसार आवश्यक असल्यास ठिकाणी तैनात असलेले संबंधित पोलीस अधिकारी निर्णय घेऊ शकतील, असे आधी सूचनेत नमूद करण्यात आले आहे.
