कोल्ड्रिफ सिरप, बॕच नं. SR-१३ कफ सिरपमध्ये विषारी पदार्थतात्काळ वापर थांबवा ; अन्न व औषध प्रशासनास त्वरित कळवा.
रत्नागिरी, दि. 6 ) : कोल्ड्रिफ सिरप, बॕच नं. SR-१३ या कफ सिरपमध्ये विषारी पदार्थ आढळल्यामुळे त्याचा वापर नागरिकांनी तात्काळ थांबवावा. जर हे औषध कोणाकडे उपलब्ध असेल, तर ते जवळच्या अन्न व औषध प्रशासनाच्या कार्यालयास त्वरित कळवावे किंवा ई-मेल: acfdartn2019@gmail.com माध्यमातून थेट अन्न व औषध प्रशासनाला माहिती द्यावी, असे आवाहन अन्न व औषध प्रशासनचे सहाय्यक आयुक्त (औषधे) शशिकांत यादव यांनी केले आहे.
मध्यप्रदेश आणि राजस्थान या राज्यांमध्ये कफ सिरप औषधाच्या वापरामुळे काही बालकांचा मृत्यू झाल्याचे निदर्शनास आले आहे. या बाबत महाराष्ट्राच्या अन्न आणि औषध प्रशासनाला सतर्क करण्यात आले आहे. Coldrif Syrup (Batch No. SR- १३) Mfg. Dt. May- २०२५, Exp. Dt. April २०२७, manufactured by Sresan Pharma, Sunguvarchathiram, Kancheepuram District, Tamil Nadu यांच्या द्वारे उत्पादित केलेले असून त्यामध्ये डायथिलीन ग्लायकोल (Diethylene Glycol DEG) हा विषारी घटक मिसळलेला असल्याचे स्पष्ट झाले आहे.
या पार्श्वभूमीवर राज्यातील सर्वसामान्य जनता यांनी तत्काळ या औषधाचा वापर थांबवावा. जर हे औषध कोणाकडे उपलब्ध असेल, तर ते जवळच्या अन्न व औषध प्रशासनाच्या कार्यालयास त्वरित कळवावे किंवा ई-मेल: acfdartn2019@gmail.com च्या माध्यमातून थेट अन्न व औषध प्रशासनाला माहिती द्यावी.
या औषधाचा राज्यात वितरण झालेल्या साठ्याबाबत कारवाई घेण्याकरिता अन्न व औषध प्रशासन, महाराष्ट्र राज्य येथील अधिकारी तामिळनाडू, औषध नियंत्रण विभागाशी समन्वय साधून या उत्पादनाच्या महाराष्ट्रातील वितरणाचा मागोवा घेत आहेत. राज्यातील विक्रेते, वितरक आणि रुग्णालये यांना या औषधाच्या समूह क्रमांकाचा साठा आढळल्यास त्याचे वितरण न करता तो सर्व साठा गोठवावा अशा सूचना सर्व औषध निरीक्षक व सहाय्यक आयुक्त यांना देण्यात आलेल्या आहेत.
अन्न व औषध प्रशासन, महाराष्ट्र राज्य याबाबत सर्व आवश्यक उपाययोजना करीत आहे. जनतेने सावधानता बाळगावी आणि धोका टाळावा, असे आवाहन अन्न व औषध प्रशासनामार्फत करण्यात येत आहे.
