१ मार्चपासून शनिदेवाची मूर्ती असलेल्या शीळेला भाविकांनी ब्रँडेड खाद्यतेल अर्पण करण्याचे देवस्थानचे आदेश
शनिशिंगणापूर येथील शनैश्वर देवस्थान विश्वस्त मंडळाने दि. १ मार्चपासून शनिदेवाची मूर्ती असलेल्या शीळेला भाविकांकडून खाद्यतेलच (ब्रँडेड) अर्पण केले जावे, असा निर्णय घेतल्याची माहिती देवस्थानचे मुख्य कार्यकारी अधिकारी गोरक्ष दरंदले यांनी दिली.शनिशिंगणापूरचा ग्रामसभेचा तसा ठरावही करण्यात आल्याचे त्यांनी सांगितले.
शनिमूर्तीच्या शीळेला भाविकांकडून अखाद्यतेलही अर्पण केले जाते. अखाद्यतेलामध्ये विविध प्रकारची रसायने असल्याची शक्यता नाकारता येत नाही. या रसायनांमुळे मूर्तीची झीज होऊ शकते. या शक्यतेमुळे हा निर्णय घेण्यात आल्याची माहिती श्री. दरंदले यांनी दिली.देवस्थान विश्वस्त मंडळाने या संदर्भात परिपत्रक जारी केले असून त्याची माहिती शनिशिंगणापूर परिसरातील खाजगी व्यावसायिक, देवस्थानच्या आवारातील दुकानदार, गाळेधारक अशा सुमारे ३०० जणांना दिली आहे.
