गोगटे-जोगळेकर महाविद्यालयाच्या श्रावणी शेलारची महिला योगासन स्पर्धेत रौप्य पदक
रत्नागिरी : गोगटे-जोगळेकर महाविद्यालयाच्या श्रावणी शेलार या विद्यार्थिनीने मुंबई विद्यापीठ आंतर महाविद्यालयीन महिला योगासन- २०२५ स्पर्धेमध्ये रौप्य पदक पटकावले. २३ सप्टेंबर रोजी मुंबई विद्यापीठ, मुंबई आणि मुंबई उपनगर येथील स्टारलिंग कला विज्ञान व वाणिज्य महाविद्यालय, नेरुळ यांच्या संयुक्त विद्यमाने या ‘महिला योगासन स्पर्धेचे’ आयोजन करण्यात आले होते.
या स्पर्धेत महाविद्यालयाची श्रावणी शेलार या विद्यार्थिनीची मुंबई विद्यापीठ आंतर महाविद्यालयीन महिला योगासन २०२५ स्पर्धेसाठी कोंकण विभाग नं. ४, महिला योगासन संघामध्ये निवड झाली होती.
या स्पर्धेत गोगटे-जोगळेकर महाविद्यालय (स्वायत्त) रत्नागिरी व कोंकण विभागाचे प्रतिनिधित्व करताना श्रावणी शेलार (प्रथम वर्ष विज्ञान) या विद्यार्थीनीने योगासन- २०२५ स्पर्धेचे रौप्य पदक पटकावले आहे. स्पर्धेत सुयश प्राप्त केलेल्या श्रावणी शेलार या विद्यार्थिनीला क्रीडा संचालक डॉ. विनोद शिंदे यांचे मार्गदर्शन तसेच सहाय्यक क्रीडा शिक्षक प्रा. कल्पेश बोटके, वैभव हंजनकर यांचे सहकार्य लाभले.
मुंबई विद्यापीठ महिला योगासन स्पर्धेत रौप्य पदक प्राप्त करणाऱ्या श्रावणी शेलारला रत्नागिरी एज्युकेशन सोसायटीच्या कार्याध्यक्षा श्रीमती शिल्पा पटवर्धन, कार्यवाह सतीश शेवडे, जिमखाना समितीचे अध्यक्ष डॉ. चंद्रशेखर केळकर, संस्थेचे सर्व सदस्य तसेच गोगटे जोगळेकर महाविद्यालयाचे (स्वायत्त) प्राचार्य डॉ. मकरंद साखळकर, तीनही शाखांचे उपप्राचार्य, जिमखाना समितीचे उपाध्यक्ष डॉ. विवेक भिडे, सर्व प्राध्यापक, कर्मचारी यांनी अभिनंदन करून भविष्यातील यशस्वी वाटचालीसाठी शुभेच्छा दिल्या.
