महानगर गॅस कनेक्शन बंद करण्याच्या नावाखाली फसवणूक; रत्नागिरीत तक्रारी वाढल्या
फेक कॉल आणि मेसेजद्वारे नागरिकांना गंडा घालण्याचा प्रयत्न; पोलिसांकडून सतर्कतेचे आवाहन
रत्नागिरी : महानगर गॅस कनेक्शन डिस्कनेक्ट होणार असल्याचे सांगत नागरिकांना फेक मेसेज अथवा फोन करून आर्थिक फसवणूक करण्याचे प्रकार सध्या वाढले आहेत. रत्नागिरी शहर व परिसरात अशा प्रकारच्या फसवणुकीबाबत तक्रारदारांची संख्या वाढत असल्याची माहिती समोर आली आहे.
फसवणूक करणारे व्यक्ती महानगर गॅसच्या नावाचा वापर करून नागरिकांना संपर्क साधतात. कनेक्शन बंद होणार असल्याचे सांगून तातडीने पैसे भरण्यास किंवा बँकिंगशी संबंधित माहिती देण्यास भाग पाडण्याचा प्रयत्न केला जातो. त्यानंतर नागरिकांच्या खात्यातून रक्कम लंपास केली जाण्याची शक्यता असते.
या पार्श्वभूमीवर रत्नागिरी पोलिसांनी नागरिकांना सतर्क राहण्याचे आवाहन केले आहे. महानगर गॅसच्या नावाने आलेल्या कोणत्याही संशयास्पद कॉल किंवा मेसेजला प्रतिसाद देऊ नये. तसेच बँक खाते क्रमांक, डेबिट/क्रेडिट कार्डची माहिती, पासवर्ड, UPI पिन अथवा OTP कोणत्याही व्यक्तीसोबत शेअर करू नये, असे पोलिसांनी स्पष्ट केले आहे.
संशयास्पद लिंकवर क्लिक न करता संबंधित कंपनीच्या अधिकृत माध्यमातून माहितीची खात्री करावी. अशा प्रकारचा कॉल किंवा मेसेज आल्यास नागरिकांनी सावधगिरी बाळगून तत्काळ पोलिसांशी संपर्क साधावा, असे आवाहन करण्यात आले आहे.
