मुंबईत नालेसफाईचे कौतुक सुरू असताना महापौरांसमोरच BMC अधिकारी कोसळला उघड्या मॅनहोलमध्ये
मुंबईत काल रात्रीपासून मुसळधार पाऊस सुरू असून अनेक सखल भागांमध्ये पाणी साचल्याने नागरिकांना मोठ्या गैरसोयीचा सामना करावा लागत आहे. अशातच नालेसफाई आणि मान्सूनपूर्व तयारीबाबत महापौर रितू तावडे यांनी केलेल्या दाव्यांवर प्रश्नचिन्ह उपस्थित करणारी एक घटना समोर आली आहे.नालेसफाईच्या कामांचे कौतुक सुरू असतानाच मुंबई महानगरपालिकेचा (BMC) एक अधिकारी मॅनहोलमध्ये पडल्याचा व्हिडिओ सोशल मीडियावर व्हायरल झाला असून त्यावरून प्रशासनावर टीका होत आहे.
80 टक्क्यांहून अधिक नालेसफाई पूर्ण झाल्याचा दावा
महापौर रितू तावडे यांनी यापूर्वी विविध नाले, पर्जन्य जलवाहिन्या आणि पूरनियंत्रण कामांची पाहणी करत मुंबईतील 80 टक्क्यांहून अधिक नालेसफाई पूर्ण झाल्याचा दावा केला होता. त्यांनी प्रशासनाला गाळ उपशाची कामे वेगाने आणि गुणवत्तापूर्ण पद्धतीने पूर्ण करण्याचे निर्देशही दिले होते.
दरम्यान, काल रात्रीपासून सुरू असलेल्या जोरदार पावसामुळे शहरातील अनेक भागांत पाणी साचले. काही ठिकाणी रस्ते जलमय झाले तर वाहतुकीचाही वेग मंदावला. पावसाच्या पार्श्वभूमीवर सुरू असलेल्या पाहणीदरम्यान BMC चा एक अधिकारी उघड्या किंवा नीट संरक्षित नसलेल्या मॅनहोलमध्ये पडल्याची घटना घडली. या घटनेचा व्हिडिओ सोशल मीडियावर मोठ्या प्रमाणात शेअर केला जात असून नागरिकांकडून प्रशासनाच्या तयारीवर प्रश्न उपस्थित केले जात आहेत.
विरोधकांनीही या घटनेवरून पालिकेला धारेवर धरले आहे. “नालेसफाई पूर्ण झाल्याचे दावे केले जात असताना अधिकारीच सुरक्षित नाहीत, मग सामान्य नागरिकांचे काय?” असा सवाल उपस्थित केला जात आहे. विशेषतः पावसाळ्यात उघडी मॅनहोल्स आणि पाणी साचलेल्या रस्त्यांमुळे नागरिकांच्या जीवितास धोका निर्माण होतो, अशी टीकाही होत आहे.
