उमा वेल्फेअर इन्स्टिट्यूटच्या २१ व्या वर्धापन दिनानिमित्त ‘मिस अॅण्ड मिसेस सौंदर्या – रत्नागिरी’ स्पर्धेचे आयोजन
फॅशन डिझायनिंगचे शिक्षण व महिलांची सुप्त प्रतिभा घडवण्यासाठी चिपळूण शहरात कार्यरत असलेल्या उमा वेल्फेअर इन्स्टिट्यूटच्या २१ व्या वर्धापन दिनानिमित्त तरुणी व महिलांसाठी भव्य सौंदर्य स्पर्धेचे आयोजन करण्यात आले आहे. ‘मिस अॅण्ड मिसेस सौंदर्या – रत्नागिरी’ या नावाने ही स्पर्धा येत्या एप्रिल महिन्यात चिपळूण येथे होणार आहे.
या स्पर्धेत ‘मिस सौंदर्या’ आणि ‘मिसेस सौंदर्या’ असे दोन स्वतंत्र गट असणार असून, तरुणी व महिलांना आपला आत्मविश्वास, व्यक्तिमत्त्व आणि कलागुण सादर करण्यासाठी एक सक्षम व्यासपीठ उपलब्ध करून देणे हा या उपक्रमाचा मुख्य उद्देश आहे. महिलांमधील व्यक्तिमत्त्व विकास, सामाजिक जाणीव आणि सर्जनशीलतेला चालना देण्यासाठी हा उपक्रम राबवण्यात येत असल्याचे आयोजकांनी सांगितले.
स्पर्धेसाठी वयोगट पुढीलप्रमाणे असणार आहेत—
मिस सौंदर्या : १८ ते ३० वर्षे
मिसेस सौंदर्या : २५ ते ४५ वर्षे
या स्पर्धेमुळे ग्रामीण व शहरी भागातील महिलांना स्वतःची प्रतिभा सादर करण्याची संधी मिळणार असून, नवख्या स्पर्धकांसाठी हा एक महत्त्वाचा मंच ठरणार आहे. लवकरच स्पर्धेच्या नोंदणी प्रक्रिया व ऑडिशन फेऱ्यांची सविस्तर माहिती जाहीर करण्यात येणार आहे.
निवड झालेल्या स्पर्धकांना उमा वेल्फेअर इन्स्टिट्यूट तसेच राष्ट्रीय स्तरावरील सौंदर्य स्पर्धांच्या विजेत्यांकडून विशेष प्रशिक्षण देण्यात येणार आहे. यामध्ये व्यक्तिमत्त्व विकास, रॅम्प वॉक, स्टायलिंग आदींचा समावेश असेल.
या कार्यक्रमाला फॅशन क्षेत्रातील मान्यवर, सामाजिक संस्थांचे प्रतिनिधी तसेच विविध क्षेत्रांतील पाहुण्यांची उपस्थिती लाभणार आहे.
उमा वेल्फेअर इन्स्टिट्यूटच्या संस्थापिका सौ. उमा म्हाडदळकर म्हणाल्या,
“आम्ही केवळ मॉडेल्स घडवत नाही, तर संपूर्ण व्यक्तिमत्त्व विकसित करतो. ही स्पर्धा महिलांना फॅशन व जीवनशैली क्षेत्रात पुढे जाण्यासाठी आत्मविश्वास आणि योग्य संधी देणारी आहे. केवळ सुंदरच नव्हे, तर समाजात सकारात्मक बदल घडवण्याची इच्छा असलेल्या महिलांचा आम्ही शोध घेत आहोत.”
या भव्य कार्यक्रमासाठी रत्नागिरी जिल्ह्यातील नागरिकांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.
