सामाजिक कार्याने तळागाळातील जनतेशी नाते दृढ करणारे पत्रकार संदेश सुरेश जिमन यांना उद्या “कोकण रत्न” पुरस्कार मिळणार!
स्वतंत्र कोकण राज्य अभियान तर्फे सातत्य पुर्ण सामाजिक कार्यासाठी पत्रकार संदेश सुरेश जिमन यांना “कोकण रत्न” पुरस्कार जाहीर झाला आहे. संदेश जिमन यांच्या सामाजिक कार्याची दखल घेऊन त्यांना हा पुरस्कार प्रदान करण्यात येणार आहे.
गेल्या काही वर्षांपासून संदेश जिमन हे संगमेश्वर रेल्वे स्थानकात प्रवासी सुविधा,
गाड्यांचे थांबे, स्वच्छता यासाठी पाठपुरावा करीत आहेत. केवळ पाठपुरावा नाही तर ते काम पुर्ण होईपर्यंत त्यांना उसंत नसते. ते जिद्दीने चिकाटीने काम पुर्णत्वास नेण्यात त्यांचा हातखंडा आहे. त्याबरोबर सार्वजनिक सोयीसाठी ते कायम झटत असतात . त्यांची संघटना निसर्गरम्य चिपळूण संगमेश्वर (रेल्वे) फेसबुक ग्रुप ही सातत्याने प्रयत्नशील, क्रियाशील असते.
विशेषतः नेत्रावती एक्सप्रेस चा संगमेश्वर थांबा मिळविण्यात त्यांनी महत्त्वाची भूमिका बजावली त्यामुळेच त्यांची संगमेश्वरमध्ये “रेल्वे मॅन” म्हणून विशेष ओळख निर्माण झाली आहे. संगमेश्वर रोड रेल्वे स्थानकात मडगाव, जामनगर, पोरबंदर या एक्स्प्रेसना थांबा मिळावा म्हणून जन आंदोलन, उपोषण, कोकण रेल्वेचे अधिकारी, खासदार,आमदार, रेल्वे मंत्री, यांच्या भेटीगाठी घेतल्या.
त्यांच्या या लोकाभिमुख आणि जन हितकारी कार्याची दखल घेत स्वतंत्र कोकण राज्य अभियानाने त्यांना “कोकण रत्न” सन्मानासाठी निवड केली आहे. त्यांचा हा सन्मान म्हणजे त्यांच्या कार्याचा हा गौरव आहे.
उद्या शनिवार, दिनांक १३ डिसेंबर २०२५ रोजी सायं. ४ ते ६ या वेळेत मुंबई मराठी पत्रकार भवन, आझाद मैदानाजवळ, मुंबई येथे संस्थापक अध्यक्ष श्री संजय कोकरे यांच्या अध्यक्षतेखाली हा सन्मान सोहळा संपन्न होणार आहे.
या कार्यक्रमाला प्रमुख पाहुणे म्हणून वरिष्ठ पत्रकार आणि संपादक श्री सचिन कळझुनकर यांची मान्यवर उपस्थिती लाभणार आहे. याशिवाय अन्य नामवंत पुरस्कार प्राप्त व्यक्ती उपस्थित राहणार आहेत.
संदेश जिमन यांच्या या सन्मानामुळे संगमेश्वर तालुक्यातील वातावरण आनंदमय झाले आहे. स्थानिक नागरिक, प्रवासी वर्ग आणि पत्रकार बंधू , सामाजिक कार्यकर्त्यांकडून त्यांचे अभिनंदन करण्यात येत आहे.
