दहावी-बारावीच्या विद्यार्थ्यांसाठी मोठी बातमी! बोर्ड परीक्षांचे ‘फायनल’ वेळापत्रक जाहीर.

महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्चमध्ये घेण्यात येणाऱ्या दहावी-बारावीच्या परीक्षांचे अंतिम वेळापत्रक जाहीर करण्यात आले आहे. त्यानुसार, बारावीची परीक्षा १० फेब्रुवारीला तर, दहावीची परीक्षा २० फेब्रुवारीला सुरू होणार आहे.राज्य मंडळाच्या पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण या नऊ विभागीय मंडळांमार्फत उच्च माध्यमिक प्रमाणपत्र (बारावी) आणि माध्यमिक शालान्त प्रमाणपत्र (दहावी) लेखी आणि प्रात्यक्षिक परीक्षा घेण्यात येते. राज्य मंडळाने तारखेनुसार सविस्तर वेळापत्रक मंडळाच्या www.mahahsscboard.in या अधिकृत संकेतस्थळावर उपलब्ध करून दिले आहे.

मंडळाच्या संकेतस्थळावर वेळापत्रकाची सुविधा ही फक्त माहितीसाठी आहे. परीक्षेपूर्वी माध्यमिक शाळा आणि उच्च माध्यमिक शाळा, कनिष्ठ महाविद्यालयांकडे छापील स्वरूपात देण्यात येणारे वेळापत्रक अंतिम असणार आहे. त्या छापील वेळापत्रकावरूनच परीक्षेच्या तारखांची खात्री करून घ्यावी आणि विद्यार्थ्यांनी परीक्षा द्यावी. अन्य संकेतस्थळावरील किंवा अन्य यंत्रणेने छपाई केलेले, समाज माध्यमांवरून व्हायरल झालेले वेळापत्रक ग्राह्य धरण्यात येऊ नये, असे राज्य मंडळाचे सचिव डॉ. दीपक माळी यांनी स्पष्ट केले आहे.

प्रात्यक्षिक परीक्षेचा तपशील

बारावीची प्रात्यक्षिक, श्रेणी, तोंडी आणि अंतर्गत मूल्यमापन तसेच व्यावसायिक अभ्यासक्रम प्रात्यक्षिक परीक्षा २३ जानेवारी ते नऊ फेब्रुवारी दरम्यान आयोजित केली आहे.

दहावीची प्रात्यक्षिक, श्रेणी, तोंडी परीक्षा आणि अंतर्गत मूल्यमापन परीक्षा दोन फेब्रुवारी ते १८ फेब्रुवारी या कालावधीत होईल.

परीक्षांचे अंतिम वेळापत्रक

तपशील : परीक्षेचा कालावधी

बारावी : १० फेब्रुवारी ते १८ मार्च

दहावी : २० फेब्रुवारी ते १८ मार्च