गेल्या वर्षीच्या प्रवेशांचे जातवैधता प्रमाणपत्र सादर करण्यास मुदतवाढ!
पुणे : राज्यात गेल्यावर्षी व्यावसायिक अभ्यासक्रमांना प्रवेश घेतलेल्या सामाजिक व शैक्षणिकदृष्ट्या मागास (एसईबीसी), इतर मागास प्रवर्गातील (ओबीसी) विद्यार्थ्यांना जातवैधता प्रमाणपत्र सादर करण्यास पाचव्यांदा मुदतवाढ देण्यात आली आहे. आता उमेदवारांना पुढील तीन महिन्यांत जातवैधता प्रमाणपत्र सादर करावे लागणार आहे.
उच्च व तंत्रशिक्षण विभागाने या बाबतचा शासन निर्णय प्रसिद्ध केला. राज्यात सन २०२४-२५ या शैक्षणिक वर्षामध्ये विविध शैक्षणिक संस्थामध्ये अभियांत्रिकी, वैद्यकीय, औषधनिर्माणशास्त्र आणि इतर व्यावसायिक अभ्यासक्रमांना एसईबीसी, ओबीसी प्रवर्गातील उमेदवारांनी प्रवेश निश्चित केले आहेत. परंतु, त्यापैकी काही उमेदवार विहित कालावधीत जात वैधता प्रमाणपत्र सादर करू शकलेले नाहीत, अशा उमेदवारांना जातवैधता प्रमाणपत्र सादर करण्यास आतापर्यंत चार वेळा मुदतवाढ देण्यात आली होती. त्यात २३ जुलै २०२४, ५ सप्टेंबर २०२४ रोजी सहा महिने, ७ जानेवारी २०२५, २ मे २०२५ रोजी तीन महिन्यांची मुदतवाढ देण्यात आल्याचे शासन निर्णय प्रसिद्ध करण्यात आले होते. आता २६ ऑगस्ट रोजीच्या शासन निर्णयाद्वारे पुन्हा एकदा तीन महिन्यांची मुदतवाढ देण्यात आल्याचे स्पष्ट करण्यात आले आहे.
आता देण्यात आलेली तीन महिन्यांची मुदतवाढ एसईबीसी व ओबीसी प्रवर्गातील ज्या उमेदवारांचे प्रवेश निश्चित झालेले आहेत, परंतु जातवैधता प्रमाणपत्र दिलेल्या वेळेत प्रमाणपत्र सादर करू शकलेले नाहीत, अशाच उमेदवारांसाठीच राहील, याची नोंद घ्यावी. या अधिकच्या मुदतीत जात वैधता प्रमाणपत्र सादर करू न शकलेल्या उमेदवारांचे प्रवेश होऊ न शकल्यास त्यास संबंधित उमेदवार जबाबदार राहतील याचीही नोंद घ्यावी, असेही नमूद करण्यात आले आहे.
