सिंधुदुर्ग जिल्ह्यात आढळली दुर्मीळ ‘ कीटकभक्षी वनस्पती

सिंधुदुर्ग जिल्ह्यात केर गावात कीटकभक्षी असणार्‍या वनस्पतींच्या दुर्मीळ प्रजातीतील ‘ड्रोसेरा बर्मानी’ ही कीटकभक्षी (मांसाहारी) वनस्पती आढळली आहे. त्यामुळे येथील जैवविविधतेचे वैभव परत एकदा अधोरेखित झाले आहे.निसर्ग अभ्यासक तुषार देसाई हे वनश्री फाऊंडेशन सिंधुदुर्ग संस्थेमार्फत आयोजित पक्षी निरीक्षणासाठी फिरत असताना या दुर्मीळ वनस्पतीचे दर्शन त्यांना झाले. निसर्गरूपी अशाच एका विस्मयकारक गोष्टीचा साक्षीदार होण्याची संधी आपणास लाभली असे ते म्हणाले.

ड्रोसेरा बर्मानी प्रजाती ही एक लुप्तप्राय मांसाहारी वनस्पती असून या वनस्पतीचा उपयोग हर्बल औषधांमध्ये मोठ्या प्रमाणावर होतो. वनस्पती स्वत:चे अन्न हरितद्रव्याच्या सहाय्याने तयार करतात. परंतु काही वनस्पतींना पूरक अन्नाची गरज असते आणि ते अन्न काही वनस्पतींना किटक वा अन्य प्राण्यांना पकडून त्यांच्या शरीरातून मिळवावे लागते. अशा किटकभक्षी वनस्पतींच्या सुमारे 625 जाती असून, त्यांपैकी 30-35 जातींच्या वनस्पती भारतात सापडतात. महाराष्ट्रात फक्त पाच-सहा जातींच्या वनस्पती आढळतात