कुंभमेळ्याला जाणारी ट्रेन पकडण्यासाठी दिल्ली स्टेशनवर उसळली गर्दी झालेल्या चेंगराचेंगरीत, 18 जणांचा मृत्यू

शनिवारी (15 फेब्रुवारी) रात्री नवी दिल्ली रेल्वे स्थानकावर झालेल्या चेंगराचेंगरीत कुंभस्नानासाठी जाणाऱ्या 18 प्रवाशांचा मृत्यू झाला. मृतांमध्ये तीन मुलांचाही समावेश आहे.याशिवाय 10 जण गंभीर जखमी असल्याचे सांगितले जात आहे, त्यांना उपचारासाठी एलएनजेपी रुग्णालयात दाखल करण्यात आले आहे. पंतप्रधान मोदींपासून ते गृहमंत्री, संरक्षणमंत्री यांच्यासह अनेक नेत्यांनी या घटनेबाबत दुःख व्यक्त केले आहे. पण, अत्यंत सुरक्षित मानल्या जाणाऱ्या स्टेशनवर हजारो लोक कसे जमले? वाढत्या गर्दीवर नियंत्रण ठेवण्यासाठी वेळेवर व्यवस्था का केली गेली नाही? 15 कुटुंबांना असहाय्य करणाऱ्या या घटनेला कोण जबाबदार आहे?रेल्वेकडून नवी दिल्ली रेल्वे स्थानकावरून कुंभमेळ्यासाठी शनिवारी 2 विशेष गाड्या चालवण्याची घोषणा केली होती. आठवड्याचा शेवट असल्याने कुंभमेळ्यात स्नान करण्याच्या इच्छेने शेकडो लोक स्टेशनवर पोहोचले. बुकिंगसाठी तिकिटे उपलब्ध नसल्याने बहुतेक लोकांनी जनरल डब्याची तिकिटे खरेदी केली आणि प्लॅटफॉर्म क्रमांक 14-15 वर जमू लागले. प्रयागराजला जाणारी ट्रेन तिथून सुटणार होती.कोणत्याही ट्रेनमध्ये साधारणपणे जनरल बोगीचे 4 कोच असतात. यापैकी 2 डबे ट्रेनच्या पुढच्या भागात आणि 2 डबे मागील भागात जोडलेले असतात. प्रत्येक कोचमध्ये सुमारे 90 ते 100 आसने असतात. प्रवाशांना या जागांवर झोपण्याची सुविधा नसते, फक्त बसून प्रवास करू शकतात. त्यामुळे, ट्रेनमध्ये फक्त जनरल बोगीमध्ये जागा उपलब्ध होत्या. परंतु माहितीनुसार, परिस्थितीचा अंदाज न घेता, रेल्वे कर्मचाऱ्यांनी शनिवारी दर तासाला जनरल बोगीची 1500 हून अधिक तिकिटे विकली. यामुळे शेकडो लोक प्लॅटफॉर्मवर जमू लागले.

सूत्रांनी दिलेल्या माहितीनुसार, स्वतंत्र सेनानी एक्सप्रेस आणि भुवनेश्वर एक्सप्रेस गाड्या उशिराने धावत होत्या. त्यामुळे त्यामध्ये प्रवास करणारे प्रवासीही प्लॅटफॉर्म क्रमांक 12-13 वर वाट पाहत उभे होते. यामुळे प्लॅटफॉर्मपासून पायऱ्यांपर्यंत प्रवाशांची मोठी गर्दी झाली होती. प्रयागराजएक्सप्रेस रात्री 09.30 च्या सुमारास प्लॅटफॉर्म क्रमांक 15 वर पोहोचली. त्यात प्रवेश करण्यासाठी लोकांमध्ये चेंगराचेंगरी झाली. या धक्काबुक्कीमुळे पायऱ्यांवर उभे असलेले अनेक लोक खाली पडले.
प्रत्यक्षदर्शी प्रवाशांच्या मते, एकदा एखादा प्रवासी पडला की तो पुन्हा उठू शकत नव्हता. घटनास्थळी उपस्थित असलेल्या एका प्रवाशाने सांगितले की, ‘मी त्यावेळी पायऱ्यांजवळ होतो. जेव्हा ही चेंगराचेंगरी अचानक झाली. ट्रेन पकडण्याच्या शर्यतीत लोक एकमेकांवर चढले. अपघाताच्या भीतीने मी ताबडतोब पायऱ्यांवरून दूर गेलो. लोक ट्रेन पकडण्यासाठी एकमेकांवर धावत होते. या धक्काबुक्कीत अनेक लोक ढिगाऱ्याखाली गाडले गेले आणि गुदमरून त्यांचा मृत्यू झाला.