काशीद येथील समुद्रकिनारी पुण्यातील शाळेच्या मुख्याध्यापकांचा बुडून मृत्यू.

रायगड जिल्ह्यातील काशीद येथील समुद्रकिनारी पुण्यातील शाळेच्या मुख्याध्यापकांचा बुडून मृत्यू होण्याची घटना शुक्रवारी घडली. धर्मेंद्र देशमुख (वय 56) असे त्यांचे नाव आहे.पुणे जिल्ह्यातील हवेली तालुक्यातील पिसोली येथील महात्मा ज्योतिराव हायस्कूल येथील शाळेचा 11 जणांचा समूह काशीद समुद्र किनारी फिरण्यास आला होता. यामध्ये शिक्षकांसह मुख्याध्यापक सुद्धा आले होते. बहुसंख्य लोक काशीद समुद्र किनारी पोहण्यासाठी उतरले.

पोहता पोहता या शाळेचे मुख्याध्यापक धर्मेंद्र देशमुख ( वय 56) हे खोलवर पाण्यात खेचले गेले. ते बराच वेळ पाण्याखाली राहिले. शेवटी किनार्‍यावरील जीवरक्षकांनी त्यांना पाण्याबाहेर काढून बोर्ली आरोग्य केंद्रात नेले. तेथून अधिक उपचारांसाठी अलिबाग जिल्हा रुग्णालयात दाखल केले. पण तेथे उपचारापूर्वीच ते मरण पावले.