ओव्हरटेक करताना टेम्पो पलटी होऊन भीषण अपघात सात महिला गंभीर जखमी, एकीचा मृत्यू
राजापूर तालुक्यातील मीठगवाणे येथील जैतापूरसागरी महामार्गावर आज सकाळी सव्वा नऊच्या सुमारास ओव्हरटेक करीत असताना चालकाचा ताबा सुटल्याने टेम्पो पलटी झाला त्यामुळ भीषण अपघातात टेम्पोतील लोक जखमी झाले असून सात महिला गंभीर जखमी झाल्या आहेत, त्यापैकी एक महिलेचा मृत्यू झाला आहे.
प्राथमिक माहितीनुसार, वाघ्रण येथून बागकामासाठी जानशी पठाराकडे महिला कामगारांना घेऊन निघालेला टेम्पो समोरून जात असलेल्या लक्झरी बसला ओव्हरटेक करत असताना टेम्पो चालकाचा ताबा सुटला. त्यामुळे टेम्पो सुमारे रस्त्याच्या कडेला पलटी मारत फरफटत गेला. या अपघातात टेम्पोतील सर्व महिला व एक छोटी मुलगी गंभीर जखमी झाली. तसेच टेम्पोचालक आणि केबिनमधील इतर पुरुष प्रवासीही जखमी झाले.
सर्व जखमींना स्थानिक नागरिकांच्या मदतीने तत्काळ जैतापूर प्राथमिक आरोग्य केंद्रात दाखल करण्यात आले. त्यानंतर अधिक उपचारासाठी त्यांना रत्नागिरी सिव्हिल हॉस्पिटल येथे हलविण्यात आले. मात्र, उपचारादरम्यान एका महिलेचा मृत्यू झाला.
