त्या सोनाराच्या टोळीने रत्नागिरीतील पतसंस्थेसह आणखी एका बँकेला घातला गंडा 

सोन्याचा मुलामा दिलेले बनावट दागिने गहाण ठेवून कर्ज घेणार्‍या टोळीची अनेक प्रकरणे उजेडात येत आहेत. रत्नागिरी शहरातील श्री समर्थ भंडारी नागरी सहकारी पतसंस्थेसह कोल्हापुरातील एका बँकेच्या रत्नागिरी शाखेचीही फसवणूक केल्याचा प्रकार उघडकीस आला आहे.पोलिसांनी याप्रकरणी रत्नागिरीतील श्री भंडारी नागरी सहकारी पतसंस्थेच्या तक्रारीवरून योगेश पांडुरंग सुर्वे (रा. कुवेशी) याच्याविरोधात गुन्हा दाखल केला आहे. पोलिसांनी त्याला बुधवारी रात्री अटक केली असून एका बँक शाखेची तक्रार दाखल होण्याची शक्यता आहे. या प्रकरणात रत्नागिरीसह राजापूरपर्यंत सध्या विविध गुन्ह्यांनी यंत्रणेची धावपळ सुरू आहे. रत्नागिरी स्थानिक गुन्हे शाखेमार्फत राजापुरातील चोरीची चौकशी सुरू होती. दरम्यान नकली सोन्याद्वारे कर्ज काढून पतसंस्था, बँकांची फसवणूक करणार्‍या टोळीचा पर्दाफाश पोलिसांनी केला. याप्रकरणी पोलिसांनी कोल्हापूर येथील सोनार अमोल पोतदारसह त्याचे साथीदार योगेश सुर्वे (रा. कुवेशी), अमेय पाथरे (पावस) व प्रभाकर नाविक या चौघांना संशयित म्हणून यापूर्वीच अटक केली आहे.दरम्यान तपासात रत्नागिरी शहरातील श्री समर्थ भंडारी नागरी सहकारी पतसंस्थेसह कोल्हापुरातील एका बँकेच्या रत्नागिरी शाखेचीही फसवणूक केल्याचा प्रकार पोलिसांच्या तपासात उघडकीस आला आहे. येथील योगेश पांडुरंग सुर्वे याने श्री समर्थ भंडारी नागरी सहकारी पतसंस्थेत १४ जानेवारी २०२३ रोजी ५४ ग्रॅम वजनाच्या दोन साखळ्या गहाण ठेवल्या. त्यावर १ लाख ८५ हजार व ३७ हजार रुपये असे एकूण २ लाख २२ हजार ५०० रुपयांचे कर्ज घेतले होते. ही बाब श्री समर्थ भंडारी नागरी सहकारी पतसंस्थेच्या लक्षात आली. त्यामुळे पतसंस्थेचे किशोर खताते यांनी दिलेल्या तक्रारीवरून शहर पोलिसांनी गुन्हा दाखल केला आहे. या गुन्ह्यातील योगेश सुर्वे याला अटक करण्यात आली आहे. www.konkantoday.com