दापोली तालुक्यातील माथेगुजर-बौद्धवाडी येथे भर दुपारी बिबट्याचा कुत्र्यावर हल्ला

दापोली तालुक्यातील माथेगुजर-बौद्धवाडी येथे भर दुपारी बिबट्याने कुत्र्यावर हल्ला केला. मात्र मालकाने प्रसंगावधान दाखवत जोरजोरात आरडाओरडा केल्याने बिबट्याने पळ काढल्याने या कुत्र्याचा जीव वाचला. मात्र यामुळे परिसरात बिबट्याची दहशत निर्माण झाली आहे.माथेगुजर येथील रहिवासी कमळकर पवार यांची बौद्धवाडीच्या पुढे काजूची बाग आहे. या बागेमध्ये ते राहतात. त्यांचा एक पाळीव कुत्रा आहे. सोमवारी दुपारी दीड वाजता बिबट्याने घराबाहेरील कुत्र्यावर अचानक हल्ला केला. या बिबट्याला मारण्यासाठी उपयुक्त अशी कोणतीही वस्तू हातात नसल्याने पवार यांनी जोरजोरात आरडाओरडा करायला सुरूवात केली. त्यांच्या आवाजाने घाबरून बिबट्याने कुत्र्याला तिथेच टाकून पळ काढला.www.konkantoday.com