मासेमारी व पर्यटन दुहेरी परवाना द्या,भारती आयोजित राष्ट्रीय मत्स्यसंमेलनात मागणी

मासेमारी व पर्यटन दुहेरी परवाना द्या,
अशी मागणी सहकार भारती आयोजित राष्ट्रीय मत्स्यसंमेलनात प्रथमच करण्यात आली, अशी माहिती रविकिरण निलक्रांती कृषी व मत्स्य पर्यटन सहकारी संस्थेचे अध्यक्ष रविकिरण तोरस्कर यांनी दिली.वाशी येथील विष्णुदास भावे सभागृह येथे शुक्रवारी सहकार भारती संघटनेने राष्ट्रीय मत्स्य संमेलन आयोजित केले होते. यास २५ राज्यांतील ६०० प्रतिनिधी उपस्थित होते. यामध्ये गोडे पाणी, खारेपाणी तसेच निमखारे पाण्यातील मच्छिमार संघटना व मत्स्य शेतकरी सहभागी झाले होते. त्याचप्रमाणे मत्स्य व्यवसाय क्षेत्रातील सहकारी संस्थांचे प्रतिनिधीही मोठ्या प्रमाणात उपस्थित होते.
‘एकीकृत मत्स्य पालन विकास’, या विषयाच्या अनुषंगाने संमेलनात विविध चर्चासत्रे संवाद व तज्ञांचे मार्गदर्शन झाले. राष्ट्रीय मत्स्यसंमेलनाचे उद्‍घाटन केंद्रीय मत्स्योद्योग मंत्री पुरुषोत्तम रुपाला यांच्या हस्ते झाले. यावेळी त्यांनी पंतप्रधान नरेंद्र मोदी यांनी मत्स्यव्यवसाय संदर्भात सुरू केलेल्या योजनांचा तसेच गेल्या नऊ वर्षांमध्ये वाढलेल्या आयातीचा उल्लेख करत मत्स्यव्यवसायामध्ये भारत अग्रेसर असल्याचे स्पष्ट केले. त्यांनी उपस्थित प्रतिनिधींना आपल्या समस्या व सूचना सहकार भारतीमार्फत केंद्रीय मत्स्योद्योग मंत्रालयाला अवगत करण्यास सांगितले. यावेळी देशभरातून आलेल्या विविध प्रतिनिधींनी आपआपले म्हणणे, समस्या याबाबत सूचना केल्या. यामध्ये प्रथमच राष्ट्रीयस्तरावर एक मच्छीमार दोन परवाने ही संकल्पना तोरसकर यांनी मांडली. केंद्रीय सागरी मत्स्योद्योग धोरण २०१६ च्या अंतर्गत मच्छीमारास मासेमारी तसेच पर्यटन असे दोन परवाने देण्याबाबत तरतूद केली आहे. याचा वापर करून त्याचे कायद्यात रूपांतर व्हावे. जेणेकरून मच्छीमारास मासेमारी बरोबरच पर्यटनातून उत्पन्नाचा स्रोत निर्माण होईल, अशी भूमिका मांडली.
www.konkantoday.com