
ओव्हर ब्रिज हटवण्याच्या कामामुळे कोकण रेल्वे मार्गावरील गाड्यांच्या फेर्यांवर परिणाम
मुंबईतील छत्रपती शिवाजी टर्मिनस ते मस्जिद रेल्वे स्थानकादरम्यान असलेला रोड ओव्हर ब्रिज हटवण्याच्या कामासाठी रेल्वेने ट्रॅफिक तसेच पावर ब्लॉक घेतला आहे. या कामामुळे मुंबई बाहेरील शहरांमधून सीएसएमटीकडे येणार्या ११ एक्स्प्रेस गाड्यांच्या फेर्यांवर परिणाम होणार आहे. त्यामुळे प्रवाशांनी निघताना गाडीचे वेळापत्रक जाणून घेवूनच प्रवास करावा, असे आवाहन करण्यात आले आहे.
रेल्वे मार्गावरील जुना पुल तोडण्याचे काम १९ व २० नोव्हेंबरला केले जाणार आहे. मध्य रेल्वेच्या या ब्लॉकमुळे कोकण रेल्वेच्या ११ गाड्यांचे वेळापत्रकावर त्याचा परिणाम होणार आहे. कामासाठी मध्य रेल्वेने ब्लॉक घेतल्यामुळे मडगांव-मुंबई सीएसएमटी जनशताब्दी एक्स्प्रेसचा १९ व २० नोव्हेंबरचा प्रवास दादर स्थानकातच संपणार आहे. याचबरोबर मडगांव-मुंबई सीएसएमटी या तेजस एक्स्प्रेसचा प्रवासही १९ व २० नोव्हेंबरला दादर स्थानकातच संपणार आहे. रेल्वे मार्गावरील का कामामुळे १९ नोव्हेंबरला सुटणारी मांडवी एक्स्प्रेस १९ नोव्हेंबरला पनवेल स्थानकातच थांबणार आहे. १९ नोव्हेंबरला सुटणारी मडगांव-मुंबई कोकणकन्या एक्स्प्रेसही मडगांवहून मुंबईला येताना पनवेल स्थानकापर्यंतच धावणार आहे. तसेच मंगळूर जंक्शन ते मुंबई सीएसएमटी स्थानकादरम्यान धावणारी सुपरफास्ट एक्स्प्रेस पनवेलपर्यंतच धावणार आहे. रेल्वे ब्लॉकमुळे २० नोव्हेंबरला मडगांव-मुंबई सीएसएमटी ही गाडी पनवेलपर्यंतच येणार आहे. मध्य रेल्वेच्या या ब्लॉकमुळे मुंबईतून बाहेर जाणार्या पाच गाडयांच्या सुटण्याच्या ठिकाणांमध्ये बदल करण्यात आले आहेत.
रेल्वेने दिलेल्या माहितीनुसार २० नोव्हेंबरला जनशताब्दी एक्स्प्रेस दादर स्थानकातूनच कोकण रेल्वेसाठी रवाना होणार आहे. मुंबई ते मडगांव दरम्यान मांडवी एक्स्प्रेस पनवेल स्थानकातून कोकण रेल्वेसाठी रवाना होईल. २० नोव्हेंबरची मुंबई सीएसएमटी ते मंगळूर दरम्यान धावणारी सुपरफास्ट एक्स्प्रेस पनवेल स्थानकातूनच सुटणार आहे. कोकणकन्या एक्स्प्रेस १९ व २० नोव्हेंबरला सीएसएमटीऐवजी पनवेल स्थानकातूनच मडगावला जाण्यासाठी रवाना होणार आहे. www.konkantoday.com