महामार्गावरील भोस्ते घाटात दुचाकींचा अपघात चारजण जखमी, दोन गंभीर जखमींना डेरवण येथे हलविले
खेड :मुंबई गोवा महामार्गावरील भोस्ते घाटात दोन दुचाकी समोरासमोर धडकून झालेल्या अपघातात चारजण जखमी झाले. हा अपघात बुधवारी सायंकाळी घडला. शंकर विष्णू जाधव, रोहित वसंत जाधव, विनोद शंकर जोशी आणि अमित रामचंद्र जोशी अशी जखमींची नावे आहेत.
घटनास्थळावरून मिळालेल्या माहितीनुसार ऍक्टिवा दुचाकीने भोस्ते घाट उतरणाऱ्या दुचाकीस्वारांना रॉंग साईडने आलेल्या शाईन दुचाकीने धडक दिल्याने भोस्ते घाटातील स्वरूप ढाब्याजवळ हा अपघात घडला. या अपघतात दोन्ही दुचाकींवरील दुचाकीस्वार जखमी झाले.
अपघाताची खबर मिळताच खेड येथील मदत ग्रुपचे अध्यक्ष प्रसाद गांधी आणि त्यांच्या सहकाऱ्यांनी तात्काळ घटनास्थळी धाव घेतली. जखमी अवस्थेत असलेल्या चारही दुचाकीस्वारांना मदत ग्रुपच्या रुग्णवाहिकेने कळंबणी येथील उपजिल्हा रुग्णालयात दाखल करण्यात आले. मात्र यातील दोघांची प्रकृती चिंताजनक असल्याने त्यांना कळंबणी येथे प्रार्थमिक उपचार करून अधिक उपचारांसाठी डेरवण येथील वालावलकर रुग्णालयात हलविण्यात आले.
