मुंबईतील ओशिवरा फर्निचर मार्केटमध्ये भीषण आग, १० ते १२ दुकाने जळून खाक.
मुंबईतील अंधेरीतील ओशिवरा एसवी रोडवरील फर्निचर मार्केटमध्ये मोठी आग लागली आहे. सकाळी साडे अकराच्या सुमारास ही आग लागली असून अग्निशमन दलाच्या सहा गाड्या घटनास्थळी दाखल झाल्या आहेत.आगीवर नियंत्रण मिळविण्याचे काम सुरु आहे. आग नेमकी कशामुळे लागली याचे कारण अद्याप समोर आलेले नाही.
परिसरात धुराचे मोठे लोट पसरले आहेत. स्थानिक नागरिकांमध्ये या आगीमुळे घबराट निर्माण झाली आहे. पश्चिम अंधेरीतील या भागात लाकडी फर्निचरचे मोठे मार्केट आहे. या आगीत दहा ते बारा दुकाने जळून खाक झाली आहेत.
