मुंबई-गोवा महामार्गावरील निवळी उतारात भरधाव भरधाव कंटेनर उलटून चालकाचा मृत्यू!

मुंबई-गोवा महामार्गावरील निवळी उतारात भरधाव कंटेनर उलटून झालेल्या अपघातात गंभीर जखमी झालेल्या चालकाचा उपचारांदरम्यान जिल्हा शासकीय रुग्णालयात मृत्यू झाला. अपघाताची ही घटना शुक्रवारी दि. 5 रोजी स. 6.45 वा. घडली असून कंटेनर चालक सुभाष जगतपाल वर्मा (23 छातरपूर, उत्तर प्रदेश) याचा उपचारांदरम्यान मृत्यू झाला.

सुभाष वर्मा हा (एमएच 46 बीबी 1537) कंटेनर मधून ऑक्सिजन व हेलियम गॅस घेऊन जयगड ते मुंबई असा भरधाव वेगाने जात असताना बावनदी-सुतारवाडी येथील उतारातील वळणावर त्याचा कंटनेरवरील ताबा सुटला. त्यामुळे कंटेनर उलटून अपघात झाला. यात गंभीर जखमी झालेल्या सुभाषला तातडीने जिल्हा रुग्णालयात दाखल करण्यात आले. परंतु उपचारांदरम्यान त्याचा मृत्यू झाला.

अपघाताची माहिती मिळताच ग्रामीण पोलिस ठाण्याचे निरीक्षक राजेंद्र यादव आपल्या पथकासह घटनास्थळी दाखल झाले. पोलिसांनी अपघाताची पंचनामा करून कंटेनर बाजूला करून रहदारी सुरळीत केली.