चिपळूण नगर परिषदेची अतिक्रमणविरोधी मोहीम तीव्र, शेकडो खोकेधारकांवर व फेरीवाल्यांवर कारवाई

चिपळूण ः चिपळूण नगर परिषदेच्यावतीने भाजी मंडई परिसरात अतिक्रमणाविरूद्ध जोरदार कारवाई केल्यानंतर दुसर्‍या दिवशीही अतिक्रमणाविरूद्ध कारवाई सुरूच ठेवली. मध्यवर्ती बस स्थानक व भोगाळे परिसरातील अतिक्रमणांवर कारवाई करून त्यांचे सर्व साहित्य जप्त केले. त्यामुळे हा परिसर मोकळा झाला. नगर परिषदेने फेरीवाला धोरणानुसार व्यवसाय करण्याकरिता खोकेधारकांना व हातगाडी धारकांना शहरातील काही जागा निश्‍चित केल्या होत्या. परंतु त्या जागा वगळून अनेकांनी गजबजलेल्या ठिकाणी अनधिकृत खोके व हातगाड्या उभ्या केल्या होत्या. त्याविरूद्ध नगर परिषदेने कडक भूमिका स्विकारून यावर कारवाई केली. यातील बंदिस्त स्वरूपात असलेली बांधकामे जेसीबी लावून तोडण्यात आली. नगर परिषदेच्या या धडक मोहिमेमुळे चिपळुणातील अतिक्रमण करून व्यवसाय करणार्‍यांनी धसका घेतला आहे.