मधुमेही रुग्णांसाठी दिलासा, आठवड्यातून एकदाच इन्सुलिन; ‘Awiqli’ भारतात दाखल
मधुमेहाच्या उपचारात महत्त्वाची घडामोड घडली असून डेन्मार्कस्थित औषधनिर्माता कंपनी Novo Nordisk ने भारतात ‘Awiqli’ (Insulin Icodec) हे आठवड्यातून एकदाच घेण्याचे बेसल इन्सुलिन उपलब्ध केले आहे. टाइप-1 आणि टाइप-2 मधुमेह असलेल्या प्रौढ रुग्णांसाठी हे औषध वापरता येणार असून, दररोज इन्सुलिन घेण्याऐवजी आठवड्यातून एकच इंजेक्शन घेण्याचा पर्याय उपलब्ध झाला आहे.
या नव्या उपचारपद्धतीमुळे वर्षभरात लागणाऱ्या सुमारे 365 इंजेक्शनची संख्या केवळ 52 पर्यंत कमी होऊ शकते. त्यामुळे दररोज इंजेक्शन घेण्याचा मानसिक ताण कमी होण्यास मदत होईल, असा कंपनीचा दावा आहे.
इन्सुलिन हा स्वादुपिंड तयार करणारा हार्मोन असून तो रक्तातील साखरेचे प्रमाण नियंत्रित ठेवण्यासाठी आवश्यक असतो. टाइप-1 मधुमेहात शरीर पुरेसे इन्सुलिन तयार करत नाही, तर टाइप-2 मधुमेहाच्या काही रुग्णांमध्ये इन्सुलिनचा परिणाम कमी होतो. अशा वेळी इन्सुलिन उपचार आवश्यक ठरतात.
कंपनीच्या माहितीनुसार, भारतातील अनेक रुग्ण दररोज इंजेक्शन घ्यावे लागेल या भीतीमुळे इन्सुलिन उपचार उशिरा सुरू करतात. आठवड्यातून एकदाच इंजेक्शन घ्यावे लागणार असल्याने अधिक रुग्ण वेळेत उपचार सुरू करतील, अशी अपेक्षा व्यक्त करण्यात आली आहे.
‘Awiqli’ च्या 700 युनिटच्या पॅकची किंमत 2,611 रुपये ठेवण्यात आली आहे. कंपनीच्या म्हणण्यानुसार हे औषध सध्या उपलब्ध असलेल्या अनेक दैनंदिन बेसल इन्सुलिनपेक्षा 30 ते 40 टक्के स्वस्त ठरू शकते.
मुंबईतील मधुमेहतज्ज्ञ डॉ. राजीव कोविल यांनी या औषधाच्या किमतीचे आणि उपचारपद्धतीतील सोयीचे स्वागत केले आहे. त्यांच्या मते, क्लिनिकल चाचण्यांमध्ये या औषधाने दररोजच्या बेसल इन्सुलिनइतकेच, काही प्रकरणांमध्ये त्यापेक्षाही चांगले रक्तातील साखर नियंत्रण दाखवून दिले आहे. मात्र, हे औषध केवळ डॉक्टरांच्या सल्ल्यानुसारच वापरावे.
