७२ व्या अखिल भारतीय सहकारी सप्ताहाचा रत्नागिरीत शुभारंभ

रत्नागिरी : राज्यभरात साजरा होत असलेल्या ७२ व्या अखिल भारतीय सहकारी सप्ताहाचा रत्नागिरीतही (दि. १४ नोव्हेंबर) उत्साहात शुभारंभ झाला. रत्नागिरी जिल्हा सहकारी बोर्डाच्या वतीने १४ ते २० नोव्हेंबर या कालावधीत या सप्ताहाचे आयोजन करण्यात आले असून, यानिमित्ताने विविध कार्यक्रमांची आखणी करण्यात आली आहे.

सप्ताहाच्या पहिल्याच दिवशी, रत्नागिरी शहरातील व्यापाऱ्यांना सहकाराचे महत्त्व पटवून देण्यासाठी एका विशेष जनजागृती मोहिमेचे आयोजन करण्यात आले.

महामानवांना अभिवादन करून शुभारंभ
या सप्ताहाच्या उपक्रमांची सुरुवात रत्नागिरीतील महामानवांना आणि आराध्य दैवताला अभिवादन करून करण्यात आली.

सुरुवातीला, मारुती मंदिर येथील छत्रपती शिवाजी महाराजांचा पुतळा, त्यानंतर जुना माळ नाका येथील स्वर्गीय शामराव पेजे यांचा पुतळा आणि सिव्हील हॉस्पिटल परिसरातील महामानव डॉ. बाबासाहेब आंबेडकर यांच्या पुतळ्यास पुष्पहार अर्पण करून मान्यवरांच्या हस्ते विनम्र अभिवादन करण्यात आले.

बाजारपेठेत व्यापाऱ्यांना पुस्तिका वितरण

अभिवादन कार्यक्रमानंतर, जिल्हा बोर्डाच्या पदाधिकाऱ्यांनी थेट रत्नागिरी शहराची मुख्य बाजारपेठ गाठली. यावेळी व्यापाऱ्यांशी प्रत्यक्ष संवाद साधत त्यांना सहकाराचे फायदे आणि महत्त्व पटवून देण्यात आले. तसेच, सहकार विषयक सविस्तर माहिती देणाऱ्या एका विशेष पुस्तिकेचे व्यापाऱ्यांना आणि नागरिकांना वितरण करण्यात आले.

मान्यवरांची प्रमुख उपस्थिती

याप्रसंगी रत्नागिरी जिल्हा सहकारी बोर्डाचे अध्यक्ष हेमंत वणजु , उपाध्यक्ष प्रताप सावंत, रत्नागिरी शहर व्यापारी महासंघाचे अध्यक्ष गणेश भिंगार्डे, जिल्हा सहकारी बोर्डाचे मुख्याधिकारी ए. आर. कळंत्रे, तसेच जिल्हा बोर्डाचे संचालक प्रभाकर शेट्ये, रामचंद्र गराटे, नितीन कांबळे, चंद्रकांत परवडी, सीताराम लांबोरे, आणि प्राची टिळेकर आदी मान्यवर उपस्थित होते.

सहा दिवस विविध कार्यक्रमांचे आयोजन

जिल्हा सहकारी बोर्डाच्या वतीने पुढील सहा दिवस (२० नोव्हेंबरपर्यंत) सहकार विषयक प्रचार आणि प्रसार करण्यासाठी विविध कार्यक्रमांचे आयोजन करण्यात आले आहे. या माध्यमातून सहकार चळवळ अधिक बळकट करण्याचा प्रयत्न केला जाणार असल्याचे अध्यक्ष हेमंत वणजु यांनी सांगितले.