चिपळूण शहरात एक धक्कादायक घटना, नगरसेवकाच्या चालकावर हल्ला; चौघांकडून गाडीत कोंबून मारहाण
चिपळूण शहरात एक धक्कादायक घटना घडली असून नगर परिषदेतील तरुण नगरसेवक साजिद सरगुरोह यांच्या चालकावर हल्ला झाल्याची माहिती समोर आली आहे.
मजरेकाशी येथील रहिवासी फैजल कर्जीकर हे गेल्या दोन महिन्यांपासून साजिद सरगुरोह यांच्याकडे चालक म्हणून कार्यरत आहेत. सोमवारी रात्री काही व्यक्तींनी त्यांना जबरदस्तीने गाडीत बसवून मारहाण केल्याचा आरोप आहे. या घटनेत चौघांचा सहभाग असल्याचे सांगितले जात असून त्यामध्ये एका महिलेचाही समावेश असल्याची माहिती पुढे येत आहे.
मारहाणीनंतर जखमी अवस्थेत फैजल कर्जीकर यांना तात्काळ कामथे उपजिल्हा रुग्णालयात दाखल करण्यात आले. सध्या त्यांच्यावर उपचार सुरू आहेत.
या प्रकरणामागचे नेमके कारण अद्याप स्पष्ट झाले नसून पोलीस अधिक तपास करत आहेत. संबंधितांकडून माहिती घेतली जात असून पुढील चौकशी सुरू आहे.
