सागरी संरक्षणाच्या सामर्थ्यामध्ये मोठी भर, आण्विक पाणबुडीवरून आंतरखंडीय बॅलेस्टिक क्षेपणास्त्राची नुकतीच यशस्वी चाचणी
देशाच्या सागरी संरक्षणाच्या सामर्थ्यामध्ये मोठी भर पडली असून आण्विक पाणबुडीवरून आंतरखंडीय बॅलेस्टिक क्षेपणास्त्राची नुकतीच यशस्वी चाचणी घेण्यात आली. बंगालच्या खाडीमध्ये मंगळवारी ‘आयएनएस अरीघात’ या आण्विक पाणबुडीवरून ‘के-४’ हे क्षेपणास्त्र डागण्यात आले.विशाखापट्टणच्या किनाऱ्यावर ही चाचणी घेण्यात आल्याची माहिती सूत्रांनी दिली. समुद्रतळाशी राहून शत्रूच्या जहाजांचा वेध घेण्याचे नौदलाचे सामर्थ्य यामुळे वाढेल.
पाणबुडीवरून डागता येणाऱ्या ‘के-४’ या क्षेपणास्त्राची भारतीय नौदलाने २९ ऑगस्ट २०२४ रोजी यशस्वी चाचणी घेतली होती. यामुळे जमीन, हवा,आणि समुद्रतळाशी राहून लक्ष्याचा वेध घेऊ शकणाऱ्या काही मोजक्या देशांच्या समूहामध्ये देशाचा समावेश झाला आहे.
जमिनीवरून जमिनीवर मारा करू शकणाऱ्या दीर्घपल्ल्याच्या ‘अग्नी-३’ या क्षेपणास्त्रापासून प्रेरणा घेत ‘के-४’ ची निर्मिती करण्यात आली आहे. समुद्रातळाशी राहून डागता येण्याजोगे हे दीर्घपल्ल्याचे क्षेपणास्त्र आहे. मूळ जमिनीवरून मारा करणाऱ्या क्षेपणास्त्रामध्ये सुधारणा करून याची निर्मिती करण्यात आल्याचे संशोधकांचे म्हणणे आहे.
