महाराष्ट्र लोकसेवा आयोग पूर्व परीक्षा 4 जानेवारी 2026 रोजी परीक्षा केंद्राच्या परिसरात प्रतिबंधात्मक आदेश
रत्नागिरी, दि. 19 ): महाराष्ट्र लोकसेवा आयोगामार्फत घेण्यात येणारी महाराष्ट्र गट –ब (अराजपत्रित) सेवा संयुक्त पूर्व परीक्षा 2025 ही परीक्षा 4 जानेवारी 2026 रोजी होत आहे. या दिवशी परीक्षा केंद्राच्या 100 मीटर परिसरात सकाळी 8 ते दुपारी 2 वाजेपर्यंत प्रतिबंधात्मक आदेश अपर जिल्हादंडाधिकारी चंद्रकांत सूर्यवंशी यांनी लागू केले आहेत.
महाराष्ट्र लोकसेवा आयोगामार्फत घेण्यात येणारी महाराष्ट्र गट –ब (अराजपत्रित) सेवा संयुक्त पूर्व परिक्षा 2025 ही परिक्षा 4 जानेवारी 2026 रोजी रा.भा. शिर्के प्रशाला, रत्नागिरी, पटवर्धन हायस्कूल, फाटक हायस्कूल या तीन उपकेंद्रांवर आयोजित करण्यात आली आहे. ही परीक्षा सकाळी 11 ते 12 वाजता या वेळेत एका सत्रात घेण्यात येणार असून या 1190 उमेदवारांना या परीक्षेला प्रवेश देण्यात आला आहे.
भारतीय नागरिक सुरक्षा संहिता 2023 चे कलम 163 प्रमाणे प्राप्त झालेल्या अधिकारान्वये परीक्षा केंद्राच्या 100 मीटर परिसरात परीक्षेच्या कालावधीत कायदा व सुव्यवस्था अबाधित राहण्यासाठी तसेच परीक्षा सुरळीत पार पाडण्यासाठी 4 जानेवारी 2026 रोजी परीक्षेच्या दिवशी सकाळी 8 वाजलेपासून दुपारी 2 वाजेपर्यंत प्रतिबंधात्मक आदेश अपर जिल्हादंडाधिकारी चंद्रकांत सूर्यवंशी यांनी लागू केले आहेत.
या आदेशानुसार परीक्षा केंद्राच्या परिसरात परिक्षार्थी अथवा अन्य व्यक्तीकडून शांततेस बाधा होईल असे कृत्य करण्यात येणार नाही. 100 मीटर परिसरातील एस.टी.डी. बुथ, झेरॉक्स सेंटर, टायपिंग सेंटर, ध्वनीक्षेपण इ. माध्यमे आदेशाची मुदत संपेपर्यंत बंद राहतील. परीक्षा केंद्राच्या परिसरात मोबाईल फोन, सेल्यूलर फोन, फॅक्स, ई-मेल व इतर प्रसार माध्यमे घेवून प्रवेश करण्यास मनाई असेल. कोणत्याही व्यक्तीकडून परीक्षा सुरळीतपणे व शांततेच्या वातावरणामध्ये पार पडण्यासाठी कोणतीही बाधा उत्पन्न करण्यास मनाई असेल. परीक्षा केंद्रावर कोणत्याही अनधिकृत व्यक्तीस / वाहनास प्रवेशास मनाई राहील.
हे आदेश परीक्षा केंद्रावर काम करणारे अधिकारी/कर्मचारी तसेच परीक्षा केंद्रावर निगराणी करणारे अधिकारी/पोलीस अधिकारी यांच्याबाबत त्यांचे परीक्षा संबंधी कर्तव्य पार पाडण्याच्या अनुषंगाने लागू राहणार नाहीत. मात्र, त्यांना गैरप्रकार करण्यास प्रतिबंध राहील.
या आदेशाची जो अवमान्यता करील तो भारतीय न्याय संहिता, 2023 चे कलम 223 प्रमाणे शिक्षेस पात्र राहील.
