चिपळुणात वीज ग्राहकांचा स्मार्ट मिटरला विरोध कायम, केवळ २९ हजार ५२० ग्राहकांकडे स्मार्ट मीटर

चिपळूण महावितरण कंपनीकडून यापूर्वीचे वीज मिटर काढून त्याजागी स्मार्ट मीटर बसवण्यात येत आहेत. मात्र त्यास सुरुवातीपासूनच असलेल्या विरोधामुळे तालुक्यात १ लाख १६ हजार ८११ ग्राहकांपैकी अवघ्या २९ हजार ५२० ग्राहकांकडे स्मार्ट मिटर बसवण्यात आले आहेत. जिथे मागणी आहे अशाच ग्राहकांना हे मिटर बसवले जात आहेत. दरम्यान, तालुक्यातील सर्व शासकीय कार्यालयामध्ये मात्र स्मार्ट मिटर बसवण्यात आले आहेत.
राज्याप्रमाणे महावितरणकडून जिल्ह्यात अदानी इन्फ्रा इंडिया लि. या एजन्सी कंपनीच्या माध्यमातून स्मार्ट मिटर शहरी तसेच ग्रामीण भागात बसवले जात आहेत. मात्र हे मिटर बसवण्याची प्रक्रिया सुरू झाल्यानंतर त्यास सर्वच ग्राहकांनी तीव्र विरोध दर्शवून वाढीव बिले येत असल्याचा आरोप केला होता. इतकेच नव्हे तर वाढत्या विरोधामुळे सर्वपक्षीयांनी थेट महावितरणवर धडक दिली होती. ग्राहकांना स्मार्ट मिटरसंदर्भात प्रात्यक्षिके दाखवून मगच हे मिटर बसवावेत, तसेच मिटर बसवताना ग्राहकांना सक्ती केली जाऊ नये, अशा सूचना करण्यात आल्या होत्या. वारंवार होत असलेल्या विरोधामळे महावितरणने देखील मिटर बसवण्यास काही दिवसांसाठी तात्पुरती स्थगिती दिली होती. तेव्हापासून तालुक्यात स्मार्ट मिटर बसवण्याची कार्यवाही थंडावली आहे. तालुक्याचा महावितरणचे १ लाख १६ हजार ८११ इतके वीज ग्राहक आहेत. असे असताना वाढत्या विरोधामुळे २९ हजार ५२० ग्राहकांकडे स्मार्ट मिटर बसवण्यात आले आहेत.www.konkantoday.com