सांगली येथील पर्यटक तरुणाला गणपतीपुळे समुद्रात बुडताना मोरया वॉटर क्लबच्या सदस्यांनी वाचविले
कोकणातील प्रसिद्ध गणपतीपुळे समुद्रात पाण्यात पोहण्याचा मोह अनेकांना आवरत नाही मात्र बऱ्याच वेळेला समुद्राच्या पाण्याचा अंदाज न आल्याने दुर्घटना घडल्या आहेत
सांगली जिल्ह्यातील खानापूर येथील 25 वर्षीय पर्यटक तरुणाला समुद्रात बुडताना वाचविण्यात यश आल्याची माहिती समुद्रकिनार्‍यावरील मोरया वॉटर स्पोर्ट व्यावसायिक आणि जीवरक्षकांकडून देण्यात आली आहे.शशांक धीरेंद्र कुलकर्णी (वय 25) असे या तरुणाचे नाव आहे. ही घटना बुधवारी दुपारी 1 वाजण्याच्या सुमारास घडली. सांगली जिल्ह्यातील खानापूर येथील सहा तरुण मित्र देवदर्शन आणि पर्यटनासाठी आले होते. त्यातील सर्वजण समुद्रस्नानासाठी उतरले होते. यातील शशांक कुलकर्णी हा समुद्राच्या खोल पाण्यात गेल्यानंतर अडकला. यावेळी त्याच्या मित्रांनी मदतीसाठी आरडाओरडा केला असता, समुद्रकिनार्‍यावर असलेल्या मोरया वॉटर स्पोर्ट व्यावसायिकांचे कर्मचारी यांनी आपल्या जेटस्की बोटीच्या मदतीने बुडणार्‍या तरुणाच्या दिशेने धाव घेतली. त्यानंतर खोल पाण्यात बुडत असलेल्या शशांकला त्यांनी सुखरूपरीत्या पाण्याबाहेर काढले. ही कामगिरी मोरया वॉटर स्पोर्टचे कर्मचारी कैलास किशोर शितप आणि आरिफुल यांनी केली. त्यांना गणपतीपुळे ग्रामपंचायतचे जीवरक्षक यांची मदत प्राप्त झाली.
