संगमेश्वरात आढळला काळा बिबट्या

संगमेश्वर : तालुक्यातील पाटगाव देवरूख रत्नागिरी रस्त्यावर काळा बिबट्या निपचित पडलेल्या अवस्थेत आढळून आला. अंदाजे एक वर्षे वयाचा असलेला ल्या नर जातीचा हा बिबट्याची उपासमारीमुळे अशक्त असून, त्याला अधिक उपचारासाठी सातारा वनविभागातील टीटीसी सेंटर येथे पाठविण्यात आले आहे.
याबाबत सविस्तर माहिती अशी, १६ ऑगस्ट रोजी सकाळी ७.३० वाजण्याच्या सुमारास मौजे पाटगाव देवरुख रत्नागिरी रस्त्याच्या बाजूला काळा बिबट्या असल्याची माहिती पाटगाव ग्रामस्थांनी वनपाल संगमेश्वर देवरुख यांना दिली. या माहिती वन विभागातील वरिष्ठांना दिल्यानंतर सर्व कर्मचारी साहित्यासह जागेवर जाऊन खात्री केली असता या ठिकाणी काळा बिबट निपचित पडलेल्या अवस्थेत आढळून आला. सहाय्यक आयुक्त पशुसंवर्धन तालुका लघु पशुवैद्यकीय सर्व चिकित्सक विभाग देवरुख डॉ. युवराज शेट्ये यांना बोलावून त्यांच्याकडून वैद्यकीय तपासणी करून घेतली. उपासमारीमुळे हा काळा बिबट निपचिप पडला असल्याचा खुलासा पशुवैद्यकीय अधिकाऱ्यांनी केला. कोल्हापूर वनविभागाचे वन्यजीव पशुवैद्यकीय अधिकारी डॉ. संतोष वाळवेकर, सातारा वन विभागाचे (सह्याद्री व्याघ्र प्रकल्प) वन्यजीव पशुवैद्यकीय अधिकारी डॉ. निखिल बनगर, कोल्हापूर येथील पशुपर्यवेक्षक श्री. कुंभार यांच्या मार्गदर्शनाखाली या बिबट्याचे वैद्यकीय उपचार चालू आहे. या वेळी घटनास्थळी सहाय्यक वन संरक्षक रत्नागिरी चिपळूण श्रीमती प्रियंका लगड, परिक्षेत्र वन अधिकारी रत्नागिरी प्रकाश सुतार, परिमंडळ वन अधिकारी संगमेश्वर देवरुख न्हानू गावडे, वनरक्षक साखरपा सहयोग कराडे, वनरक्षक दाभोळे श्रीमती सुप्रिया काळे, वन्यजीव अभ्यासक प्रतीक मोरे, डॉ. शार्दुल केळकर, विराज आठल्ये, डॉ. प्रीतेश आढाव उपस्थित होते.
बिबट्याची तब्येत बरी होत आहे; परंतु आणखी काही दिवस उपचार करणे आवश्यक असल्याचे पशुवैद्यकीय अधिकाऱ्यांचे मत असल्याने तसेच देवरुख किंवा रत्नागिरीमध्ये बिबट्यासाठी वैद्यकीय सुविधा नसल्याने व सध्या जास्त प्रमाणात पाऊस पडत असल्याने वातावरण बदल होत आहे या कारणास्तव मुख्य वनसंरक्षक कोल्हापूर श्री. गुरुप्रसाद यांच्या मार्गदर्शनाखाली १७ ऑगस्ट या बिबट्यावर उपचार करण्यासाठी सातारा वन विभागातील टीटीसी सेंटर येथे पाठविण्यात आले आहे.
ही कार्यवाही विभागीय वन अधिकारी रत्नागिरी चिपळूण श्रीमती गिरीजा देसाई तसेच सहाय्यक वनसंरक्षक रत्नागिरी चिपळूण श्रीमती प्रियंका लगड यांच्या मार्गदर्शनाखाली करण्यात आली आहे. अशा प्रकारच्या घटना घडल्यास किंवा वन्यप्राणी अडचणीत सापडल्यास वनविभागाचा टोल फ्री क्रमांक 1926 किंवा 9421 741335 या क्रमांकावर संपर्क साधण्याचे आवाहन विभागीय वनाधिकारी रत्नागिरी गिरीजा देसाई यांनी केले आहे.