मुंबई-गोवा महामार्गासाठी पत्रकार परिषदेचे निवळी येथे आंदोलन!
रत्नागिरी : कोकणातून जाणा-या व १७ वर्षांपासून कोकणवासियांची डोकेदुखी ठरलेल्या मुंबई-गोवा महामार्गाच्या कामावर आता मराठी पत्रकार परिषदेने आवाज उठवण्याचा निर्णय घेतला आहे. या रखडलेल्या महामार्गासाठी सरकारला जाब विचारण्यात येणार आहे. याकडे सरकारचे लक्ष वेधण्यासाठी शनिवार १६ ऑगस्ट २०२५ रोजी महामार्गावरील निवळी येथे जोरदार निदर्शने करण्यात येणार आहेत.
मुंबई-गोवा महामार्गाचे काम मागील १७ वर्षांपासून सुरू आहे. या काळात राज्यात अनेक सरकारे आली आणि गेली, पण कोणीही या महामार्गाचे काम पूर्ण केले नाही. प्रत्येक सरकार फक्त आश्वासने देत गेले आहे. या सरकारांनी नवनवीन तारखा फक्त जाहीर केल्या. यामुळे कोकणातील जनतेला अनेक वर्षांपासून खड्डेमय रस्त्यांवरून प्रवास करावा लागत आहे. याचा नाहक त्रास कोकण वासियांना भोगावा लागत आहे.
महामार्गाच्या या गंभीर प्रश्नावर आता मराठी पत्रकार परिषद, रत्नागिरीने पुन्हा एकदा आवाज उठवण्याचा निर्णय घेतला आहे. या संदर्भात नुकतीच रत्नागिरी येथे एक बैठक पार पडली, ज्यात १६ ऑगस्ट रोजी सकाळी ११ वाजता निवळी येथे शांततेत निदर्शने करण्याचे ठरले आहे. या निदर्शनांमध्ये रत्नागिरी, लांजा आणि संगमेश्वर तालुक्यातील पत्रकार मोठ्या संख्येने सहभागी होणार आहेत.
काही दिवसांवर आलेल्या गणपती सणापूर्वी महामार्गाची किमान तात्पुरती डागडुजी तरी करावी. गणपतीसाठी कोकणात येणाऱ्या लाखो चाकरमान्यांना चांगल्या रस्त्यावरून प्रवास करता यावा, हीच या आंदोलनाची मुख्य भूमिका असणार आहे. या आंदोलनाच्या वेळी वाहतुकीला कोणताही अडथळा न आणता, रस्त्याच्या बाजूला उभे राहून निदर्शने केली जाणार आहे, असे पत्रकार परिषदेने स्पष्ट केले आहे. यापूर्वीही परिषदेने या प्रश्नावर आवाज उठवला होता, पण सरकारकडून ठोस उपाययोजना झाल्या नाहीत. त्यामुळे आता पुन्हा एकदा रस्त्यावर उतरून सरकारला जाब विचारण्यात येणार आहे.
