३ ऑगस्ट रोजी गुहागर येथे श्रावण भजन महोत्सवाचे आयोजन

गुहागर : अखिल भजन सांप्रदाय हितवर्धक मंडळ महाराष्ट्र राज्य आणि अखिल भजन सांप्रदाय हितवर्धक मंडळ गुहागर तालुका गुहागर यांचे सौजन्याने श्रावण भजन महोत्सवाचे आयोजन करण्यात आले आहे. या भजन महोत्सवाला मुंबईतील नामवंत भजनी बुवांची उपस्थिती लाभणार असून तालुक्यातील भजन प्रेमी जनतेने या श्रावण भजन महोत्सवाचा मोफत लाभ घ्यावा, असे जाहीर आवाहन अखिल भजन संप्रदाय हितवर्धक मंडळ गुहागर तालुका यांनी प्रसिद्धी पत्रकाद्वारे केले आहे.
गुहागर तालुक्यामध्ये प्रथमच श्रावण भजन महोत्सव २०२५ चे आयोजन रविवारी, ३ ऑगस्ट रोजी करण्यात आले आहे. भजन परंपरा टिकून राहणे कलाकाराला आपली कला जोपासता यावी आणि भजन माध्यमातून समाजप्रबोधन व्हावे आणि हिंदवी भागवत सनातन धर्माचा पताका उंच उभारावा या उदात्त हेतूने ईश्वर रूपे सेवेचा मिळालेला वारसा जपता यावा आणि जनतेला त्याचा लाभ व्हावा म्हणून तसेच वृद्ध कलाकारांना वृद्ध काळात दुसऱ्यावर अवलंबून न राहता त्यांना आपण केलेल्या कलेच्या सेवेचा शासनाकडून मोबदला मिळावा तसेच सर्व भजनी कलाकार एक व्हावे, सर्व भजनी कलाकार संघटित राहावे यासाठी या श्रावण भजन महोत्सवाचे आयोजन करण्यात आले आहे.
भंडारी भवन गुहागर कीर्तनवाडी रोड गुहागर येथे हा कार्यक्रम उत्साहात संपन्न होणार असून सकाळी ८ वाजता देवस्थान ते भंडारी भवन असा दिंडी सोहळा आणि त्यानंतर सकाळी १० वाजता कार्यक्रमाचे उद्घाटन प्रमुख मान्यवरांच्या उपस्थितीत होईल. मान्यवरांचा सत्कार आणि मनोगत हा कार्यक्रम झाल्यानंतर सकाळी १०.३० वाजता गुहागर तालुक्यातील भजन मंडळांचे सादरीकरण तसेच आयोजक मंडळातील ज्येष्ठ कलावंतांचे सादरीकरण त्यानंतर दुपारी १२ वाजता ६० वर्षांवरील वृद्ध कलाकारांचा सन्मान सोहळा आयोजित करण्यात आलेला आहे. त्यानंतर दुपारी १ वाजता स्नेहभोजन होईल. रात्री ८ वाजता मेळाव्याची सांगता होणार आहे.
यावेळी अखिल भजन सांप्रदाय हितवर्धक मंडळ महाराष्ट्र राज्याचे अध्यक्ष भगवान बुवा लोकरे, सचिव प्रमोद बुवा हर्याण, सदस्य श्रीधर बुवा मुणगेकर, सल्लागार प्रकाश बुवा चिले, माउली सावंत, रत्नागिरी जिल्हाध्यक्ष संतोष बुवा शिर्षेकर, उपाध्यक्ष संजय बुवा सुर्वे आदी मान्यवर उपस्थित राहणार आहेत.
गुहागर तालुक्यातील भजन प्रेमी जनतेने या श्रावण भजन महोत्सवाला वेळेत बहुसंख्येने उपस्थित राहावे असे जाहीर अखिल भजन सांप्रदाय हितवर्धक मंडळ महाराष्ट्र राज्य आणि अखिल भजन संप्रदाय हितवर्धक मंडळ गुहागर तालुका यांच्या संयुक्त विद्यमाने प्रसिद्धी पत्रकाद्वारे करण्यात आले आहे.