पर्यटन क्षेत्रात महिलांना नवी दिशा! BKVTI रत्नागिरीचा मोफत शैक्षणिक सेमिनार उत्साहात संपन्न

रत्नागिरी – कोकणातील महिलांसाठी पर्यटन क्षेत्रातील करिअरच्या संधींचा वेध घेणारा मोफत शैक्षणिक सेमिनार महर्षी कर्वे स्त्री शिक्षण संस्थेच्या बाया कर्वे व्होकेशनल ट्रेनिंग इन्स्टिट्यूट (BKVTI), रत्नागिरी युनिटतर्फे दि. 21 जुलै रोजी मारुती मंदिर येथील विवा एक्झिक्युटिव्ह हॉलमध्ये यशस्वीरित्या पार पडला..
“पर्यटन क्षेत्रात महिलांना सुवर्णसंधी – पर्यटनातील करिअर: दिशा आणि संधी” या विषयावर आधारित या सेमिनारमध्ये कोकणातील पर्यटन क्षेत्राचे बहुआयामी पैलू उलगडून दाखविण्यात आले. कोकणातील पर्यटनाची ओळख या विषयावर श्री. वैभव सरदेसाई (संचालक, प्राचीन कोकण म्युझियम, गणपतीपुळे) यांनी स्थानिक पर्यटन स्थळांच्या ऐतिहासिक आणि सांस्कृतिक महत्त्वावर प्रकाश टाकत विविध गोष्टीरूप उदाहरणे देत कोकणातील पर्यटनाची पार्श्वभूमी उलगडली.
पर्यटन क्षेत्रातील व्यवसाय व रोजगार संधी या विषयावर श्री. मकरंद केसरकर (पार्टनर लॅटरल कन्सेप्ट, कन्सल्टन्सी आणि प्रोजेक्ट्स सर्व्हिसेस एलएलपी ट्रॅव्हियोल्युशन) यांनी मार्गदर्शन करताना महिला उद्योजकतेच्या संधी, स्टार्टअप कल्पना व फील्ड अनुभव शेअर केले. व पर्यटन व्यवसायातील रोजगार संधींवर प्रकाश टाकला.
पर्यटन शिक्षणातील संधी या विषयावर प्रा. डॉ. मीनल ओक (संचालक, ओक्स अकॅडमी, संचालक, परशुराम शिक्षण आणि संशोधन संस्था,चिपळूण) यांनी शिक्षणाच्या माध्यमातून महिलांना या क्षेत्रात स्थिर व यशस्वी करिअर घडविण्याचे मार्ग मांडले व पर्यटन व्यवसायातील रोजगार संधींवर प्रकाश टाकला.
यानंतर BKVTI च्या टुरिझम अँड हॉस्पिटॅलिटी या कोर्स बद्दल व इतर कोर्स बद्दल सविस्तर PPT प्रेझेंटेशन टुरिझम कोर्स समन्वयक प्रा. सोनिया मापुस्कर यांनी केले.
कार्यक्रमाच्या प्रारंभी प्रकल्प समन्वयक श्री. स्वप्निल सावंत यांनी प्रास्ताविक करून संस्थेचे उद्दिष्ट स्पष्ट केले. यावेळी प्रकल्प प्रमुख श्री. मंदार सावंत देसाई, स्थानीय व्यवस्थापन समिती सदस्या सौ. स्वरूपा सरदेसाई, BKVTI स्टाफ, आणि हॉटेल इंडस्ट्रीमधील मान्यवरांचा समावेश होता.
कार्यक्रमाचा समारोप सौ. स्वरूपा सरदेसाई यांनी केला. सूत्रसंचालन कु. सिद्धी करंदीकर यांनी, तर आभार प्रदर्शन BKVTI अकॅडमिक को-ऑर्डीनेटर साधना ठाकूर यांनी केले.
या सेमिनारला विद्यार्थिनी व महिलांचा उत्स्फूर्त प्रतिसाद लाभला. पर्यटन क्षेत्रात नवे करिअर घडवण्याची प्रेरणा व दिशा या कार्यक्रमातून उपस्थितांना मिळाली. यावरून कोकणात पर्यटन क्षेत्रात महिलांसाठी नव्या संधींचे दालन खुले होत असल्याचे स्पष्ट झाले.
कोकणातील महिलांना पर्यटन व हॉस्पिटॅलिटी क्षेत्रात समावेशक संधी देणे, मार्गदर्शन व प्रशिक्षणाद्वारे सक्षम करणे, हा BKVTI रत्नागिरीचा प्रमुख उद्देश आहे.
www.konkantoday.com