सासर्‍याने केला सुनेचा विनयभंग केल्याची तक्रार दाखल.
गुहागर तालुक्यातील गिमवी गावाशेजारील एका गावातील सासर्‍याने सुनेचा विनयभंग केल्याचा प्रकार समोर आला आहे. सुनेने याबाबत गुहागर पोलीस ठाण्यामध्ये तक्रार दाखल केली असून सासर्‍याविरोधात विनयभंगाचा गुन्हा दाखल केला आहे. विनयभंग करणारा सासरा हा सर्वांना सुपरिचित आहे. गेले अनेक दिवसांपासून त्याचे असे प्रकार सुरू होते. यावर कुटुंबात बैठक होऊन सासर्‍याचा माफीनामाही झाला मात्र आपल्या सवयीतून न सुटलेल्या या सासर्‍याने आपल्या सुनेवरची वक्रदृष्टी कायम ठेवली.
तीन मुली आणि एक मुलगा असलेल्या या सासर्‍याची वाईट सवय जात नव्हती. जाता येता आपल्या सुनेला कोपर लावणे, तिच्या मनात लज्जा उत्पन्न होईल असे वर्तन करणे असे प्रकार सुरू होते. काही दिवसापूर्वी त्याने हा प्रकार केल्याने त्रस्त झालेल्या सुनेने अखेरीस गुहागर पोलीस ठाण्यामध्ये आपल्या सासर्‍या विरोधात तक्रार दाखल केली आहे. या वेळी त्याचा मुलगा हा मुंबईमध्ये नोकरीच्या शोधानिमित्त गेला होता. परंतु सासर्‍याच्या या जाचाला कंटाळून अखेर सुनेने गुहागर पोलीस ठाण्यात तक्रार दाखल केली आहे. दरम्यान, पोलिसांनी सासर्‍याविरोधात बी. एन. एस. ७५, ७६ प्रमाणे विनयभंगाचा गुन्हा दाखल केला आहे.www.konkantoday.com
