मुंबई-गोवा राष्ट्रीय महामार्गावरील संगमेश्वर येथील शास्त्री पुलाजवळ दरड कोसळली महिला जखमी, ग्रामस्थांचा ठेकेदारावर आरोप.
मुंबई-गोवा राष्ट्रीय महामार्गावरील संगमेश्वर येथील शास्त्री पुलाजवळ आज सकाळी साडेआठ वाजण्याच्या सुमारास मोठी दरड कोसळली. या दुर्घटनेत एक महिला किरकोळ जखमी झाली असून, एका रिक्षाचे मोठे नुकसान झाले आहे. आज सकाळी नेहमीप्रमाणे वाहतूक सुरू असताना अचानक शास्त्री पुलाच्या बाजूच्या डोंगरावरून मोठी दरड खाली कोसळली. या दरडीच्या काही भागाचा फटका रस्त्यावरून जाणाऱ्या एका महिलेला लागला, ज्यामुळे ती किरकोळ जखमी झाली. तसेच, पुलाजवळ उभ्या असलेल्या एका रिक्षावर दरड कोसळल्याने रिक्षाचा दर्शनी भाग पूर्णपणे चक्काचूर झाला आहे.या घटनेमुळे महामार्गावर काही काळ वाहतूक विस्कळीत झाली होती.घटनेनंतर स्थानिकांमध्ये तीव्र संतापाची लाट उसळली आहे.
नागरिकांचे म्हणणे आहे की, या धोकादायक भागातील दरड हटवण्याबाबत त्यांनी यापूर्वी संबंधित ठेकेदाराला अनेकवेळा निवेदन दिले होते. मात्र, ठेकेदाराने या मागणीकडे दुर्लक्ष केल्यामुळेच आज ही दुर्दैवी घटना घडली आहे. ठेकेदाराच्या निष्काळजीपणामुळे महिलेला दुखापत झाली आणि रिक्षाचे मोठे नुकसान झाले, असा आरोप ग्रामस्थांनी केला आहे.
