सीईटी कक्षाकडून १६ अभ्यासक्रमांसाठी प्रवेश सुरू
- राज्य सामायिक प्रवेश परीक्षा कक्षाकडून (सीईटी कक्ष) सध्या राज्यभरात तब्बल सोळा अभ्यासक्रमांच्या प्रवेशाची प्रक्रिया सुरू असून शुक्रवारी संध्याकाळपर्यंत सुमारे सव्वातीन लाख विद्यार्थ्यांनी विविध अभ्यासक्रमांसाठी अर्ज दाखल केले आहेत. यातील सर्वाधिक म्हणजे एक लाख सत्याहत्तर हजार अर्ज अभियांत्रिकीसाठी दाखल झाले असून त्या खालोखाल एमबीए, बीएड, विधी तीन व पाच वर्षे या अभ्यासक्रमांकडे विद्यार्थ्यांचा कल आहे. गेल्या काही दिवसांत ही संख्या वाढली आहे.
सीईटी कक्षाने मार्च-एप्रिल या दोन महिन्यांच्या कालावधीत अठरा हून अधिक विविध प्रवेश परीक्षा आयोजित केल्या. या परीक्षांचे निकाल मे आणि जून या दोन महिन्यांत जाहीर झाले. त्यानंतर आता प्रवेश नोंदणीला प्रारंभझाला असून सुरुवातीला विद्यार्थ्यांनी या नोंदणीसाठी धीमा प्रतिसाद दिला होता.
या अभ्यासक्रमांपैकी बहुतांश अभ्यासक्रमांच्या नोंदणीसाठी आठ दिवसांची मुदत देण्यात आली असून आठ ते नऊ जुलैदरम्यान अर्जनोंदणी पूर्ण होण्याची शक्यता आहे. यापैकी काही अभ्यासक्रमांच्या नोंदणीसाठी मुदतवाढ मिळण्याची शक्यता असली, तरी बहुतांश अभ्यासक्रमांची प्रवेश प्रक्रिया सुरू होईल. शुक्रवारी संध्याकाळपर्यंत यापैकी अभियांत्रिकीच्या अभ्यासक्रमांसाठी १,७७, २५१ विद्यार्थ्यांनी नोंदणी केली होती. यापैकी ९२,६११ विद्यार्थ्यांनी शुल्क भरत अर्ज निश्चित केले.
अशी आहे काही महत्त्वाच्या अभ्यासक्रमांची आकडेवारी-
अभ्यासक्रम-
नोंदणी- अर्ज निश्चिती
- अभियांत्रिकी १,७७,२५१- ९२,६११
- बीए ४१,०३२ – २५,५४४
- एमबीए ३७,४७३ – १२,८३७
- विधी-तीन वर्षे २८,५४८ – ११,६८९
- एमसीए १५,५७३ – ३,५२०
- विधी-पाच वर्षे १३,८७० – ९,६८१
- एमडीएस ३,४९३ – १,०७१
एमबीएसाठी अर्ज नोंदणी केलेल्या ३७,४७३ विद्यार्थ्यांपैकी फक्त १२,८३७ विद्यार्थ्यांनी अर्ज निश्चित केले. बीएडसाठी नोंदणी झालेल्या ४१,०३२ विद्यार्थ्यांपैकी २५,५४४ विद्यार्थ्यांनी शुल्क भरणा करत अर्ज निश्चित केले. यापैकी अनेक अभ्यासक्रमांसाठी आठ आणि नऊ जुलैपर्यंत अर्ज नोंदणीची मुदत आहे. त्यामुळे या अर्जसंख्येत आणखी वाढ होण्याची शक्यता सीईटी कक्षाकडून वर्तवण्यात आली आहे.
