छातीत दुखू लागल्याने संगीतकार ए आर रेहमान रुग्णालयात दाखल!
: ऑस्कर विजेते संगीतकार ए आर रेहमान यांना छातीत दुखू लागल्याने त्यांना चेन्नई येथील रुग्णालयात दाखल करण्यात आले आहे. सूत्रांनी दिलेल्या माहितीनुसार, रेहमान यांना रविवारी सकाळी चेन्नई येथील ग्रीम्स रोडवरील एका खाजगी रुग्णालयात दाखल करण्यात आले आहे. येथे त्यांच्यावर ईसीजी आणि इकोकार्डियोग्राम याबरोबरच इतर अनेक चाचण्या करण्यात आल्या. आज रेहमान यांची अँजिओग्राम चाचणी देखील केली जाऊ शकते. दरम्यान मीडिया रिपोर्ट्सनुसार रेहमान यांची प्रकृती स्थिर असल्याचे सांगितले जात आहे.
भारतीय चित्रपट क्षेत्रातील सर्वात यशस्वी संगितकार म्हणून ए आर रेहमान यांची ओळख आहे. त्यांना आजवर असंख्य पुरस्कारांनी गौरवण्यात आले आहे. ज्यामध्ये दोन अकादमी पुरस्कार, दोन ग्रॅमी पुरस्कार, एक बाफ्टा पुरस्कार, एक गोल्डन ग्लोब आणि सहा राष्ट्रीय चित्रपट पुरस्कार, तसेच भारताचा तिसरा सर्वोच्च नागरी पुरस्कार पद्मभूषण याचा देखील समावेश आहे.रेहमान यांनी १९९२ मध्ये चित्रपट क्षेत्रात काम करण्यास सुरूवात केली.
कारकिर्दीच्या सुरूवात त्यांनी दिग्गज चित्रपट निर्माते मणिरत्नम यांच्या रोजा या चित्रपटासाठी संगीत देऊन केली. त्यानंतर त्यांनी तमिळ, हिंदी, तेलगु, मल्याळम, इंग्रजी, पर्शियन आणि मँडरिन यासह अनेक भाषांमधील अनेक चित्रपटांसाठी संगीत दिले आहे.ए आर रेहमान आणि त्यांची पत्नी सायरा बानू यांचा गेल्या वर्षी नोव्हेंबरमध्ये घटस्फोट झाला आहे. दोघांनी २९ वर्षांचे नाते संपवण्याचा निर्णय घेतला. दोघांनी १९९५ साली लग्न केले होते आणि त्यांना दोन मुली आणि एक मुलगा आहे.
