रत्नागिरी जिल्हा पोलीस दलाच्या वतीने ज्येष्ठ नागरिकांसाठी नवीन हेल्पलाईन नंबर सुरू

रत्नागिरी : जिल्ह्यातील ज्येष्ठ नागरिकांना कुठल्याही संकटाच्या वेळी तसेच त्यांच्या तक्रारींचे, अडचणींचे निवारण होवून त्यांना आवश्यक ती सर्व मदत मिळावी या हेतूने पोलीस अधीक्षक धनंजय कुलकर्णी यांच्या संकल्पनेतून रत्नागिरी जिल्हा पोलीस दलाच्या वतीने ज्येष्ठ नागरिकांच्या सुरक्षेसाठी 8390929100 हा नवीन हेल्पलाईन नंबर सुरू करण्यात आला आहे. ज्यामध्ये व्हाट्सॲप (WhatsApp) सुध्दा उपलब्ध आहे.
घरातील तरुण पुरुष व महिला या नोकरी व व्यवसायानिमित्त मुंबई व इतर शहरांमध्ये वास्तव्यास असल्याने घरामध्ये ज्येष्ठ नागरिक एकटेच असतात. तसेच निराधार ज्येष्ठ नागरिक हे सुध्दा घरामध्ये एकटेच असतात. अशावेळी ज्येष्ठ नागरिकांच्या तात्काळ मदतीसाठी व त्यांच्या तक्रारींचे अडचणीचे निवारण करण्यासाठी हा हेल्पलाईन नंबर सुरू करण्यात येत आहे. हा नंबर हा २४ तास सुरू असणार आहे. ज्येष्ठ नागरिक हा समाजाचा महत्त्वपूर्ण घटक असून त्यांच्या सुरक्षेची प्राधान्यांने काळजी घेण्यासाठी रत्नागिरी पोलीस कटीबध्द आहेत.

ज्येष्ठ नागरिकांनी तात्काळ मदतीसाठी 8390929100 या हेल्पलाईन नंबरवर फोन किंवा व्हाट्सॲप मेसेज करावा, असे आवाहन रत्नागिरीचे पोलीस अधीक्षक धनंजय कुलकर्णी यांनी केले आहे.