मालवण ‘येथील राजकोट किल्ला येथे छत्रपती शिवाजी महाराजांच्या पुतळा उभारण्याच्या कामास सुरुवात.
मालवण ‘येथील राजकोट किल्ला येथे छत्रपती शिवाजी महाराजांच्या पुतळा उभारण्याच्या कामास सुरुवात करण्यात आली आहे. पहिल्या टप्प्यात चबुतऱ्यावर ज्या खडकावर छत्रपती उभे दाखविण्यात येणार आहेत, त्या खडकाचे भाग जोडण्याचे काम केले जाणार आहे. एप्रिल महिन्यापर्यंत हा पुतळा उभारण्याचे काम पूर्ण केले जाईल,’ अशी माहिती शिल्पकार राम सुतार यांचे पुत्र अनिल सुतार यांनी येथे पत्रकारांशी बोलताना दिली.राजकोट किल्ला येथे अनिल सुतार यांनी आपल्या सहकाऱ्यांसह भेट देत पाहणी केली. त्यानंतर ते पत्रकारांसोबत बोलत होते. ते म्हणाले, ‘पुतळा उभारण्याच्या कामाचा कार्यारंभ आदेश ऑक्टोबर २०२४ मध्ये दिला. दरम्यानच्या काळात निवडणुका असल्याने ही जागा २५ डिसेंबरला आमच्या ताब्यात देण्यात आली.
जागा ताब्यात घेतल्यानंतर जो जुना चबुतरा होता तो तोडला.दहा फूट खोदाई केल्यानंतर त्या ठिकाणी आढळलेल्या खडकामुळे आणखी दीड मीटर खोदाई करावी लागली. त्यानंतर १९ फेब्रुवारीला चबुतऱ्याचे काम पूर्ण करण्यात आले. या चबुतऱ्यामध्ये ड्युपलेक्स नावाचे स्टीलचे पिलर उभारले आहेत. मोठमोठ्या पुलांच्या कामांमध्ये या प्रकारचे स्टील वापरले जाते. समुद्राची खारी हवा तसेच अन्य बाबींचा विचार करून ड्युपलेक्स स्टील वापरले आहे. पुतळा उभारण्यासाठी चांगल्या दर्जाचे ब्राँझ वापरले आहे. या चबुतऱ्यावर जे ब्राँझचे खडकाचे भाग आले आहेत ते बसविण्याच्या कामास सुरुवात करण्यात येणार आहे. यासाठी क्रेनही मागविली आहे.’शिव पुतळा उभारण्याच्या कामासाठी आवश्यक असलेले सुटे भाग आणण्यात येत आहेत. त्यामध्ये ज्या खडकावर छत्रपती शिवाजी महाराज उभे राहिल्याचे दाखविण्यात येणार आहे, त्या खडकाचे भाग बसविण्याच्या कामास उद्यापासून सुरुवात होईल.
आतापर्यंत पुतळ्याचे गळ्यापर्यंतच्या भागाचे काम पूर्ण झाले आहे. जसजसे भाग येथे दाखल होतील, त्यानुसार पुतळ्याचे भाग जोडले जातील. ज्या चबुतऱ्यावर हा पुतळा उभारण्यात येत आहे, तो चबुतरा अत्यंत दर्जेदार बनविण्यात आला असून, यातील खांब हे जमिनीपासून सुमारे वीस फूट उंचीचे आहेत. त्यावर पूर्ण स्ट्रक्चर उभारण्यात येईल.
