कोकणातील प्रमुख सण शिमगोत्सवाचा भक्तीपूर्ण वातावरणात प्रारंभ.

कोकणातील प्रमुख सणांपैकी एक असलेल्या शिमगोत्सवाला जिल्ह्यात भक्तीपूर्ण वातावरणात प्रारंभ झाला आहे. गावागावातील ग्रामदेवतांच्या पालख्या रूपे लावण्यात येत असून जिल्ह्यात १३९९ पालख्या सजणार आहेत, तर १३१५ ठिकाणी सार्वजनिक तर २८५४ खाजगी होळ्या उभारण्याला प्रारंभ झाला आहे. मंगळवार फाक पंचमीपासून कोकणात शिमगोत्सवाला सुरूवात होणार आहे.

कोंकणटुडे ने संग्रहीत केलेली चित्रफीत

रत्नागिरी जिल्ह्यात शिमगोतसव जल्लोषात साजरा करण्याची फार वर्षापूर्वीपासूनची प्रथा आहे. फाक पंचमीला गावागावात होळ्या उभ्या करून शिमगोत्सवाची  सुरूवात होते. आठ दिवस हा सण उत्सवात साजरा केला जातो. त्याप्रमाणे मंगळवार ४ मार्च फाल्गुन पंचमी (फाक पंचमी) पासून या जल्लोषी उत्सवाला खर्‍या अर्थाने सुरूवात होणार आहे. आठ दिवसांनी होळ्यांचा होम झाल्यानंतर ग्रामदेवतांच्या शिमगोत्सवाला सुरुवात होते. अनेक ठिकाणी ग्रामदेवतांच्या पालख्या शिमगोत्सवाच्या दिवशी होळ्या घेण्यासाठी मंदिराबाहेर पडतात.

ढोल ताशांच्या गजरात आणि फाकांच्या आवाजात पालख्यांचे सर्वत्र स्वागत करण्यात येते. काही ठिकाणी तर पालख्यांच्या भेटीचा सोहोळा रंगतो आणि याला हजारो भक्तगण हजेरी लावतात. शिमगोत्सवाला चाकरमानी मोठ्या संख्येने गावात दाखल झाल्याने गावाचे वातावरण पूर्णतः बदलून जाणार आहे.www.konkantoday.com