कासवावरील उपचार केंद्र दापोलीत स्थापन होणार
मासेमारी करताना मच्छिमार जाळ्यात अडकल्याने कासवांना दुखापत होत असते. अनेकवेळा जाळ्याची धागा कासवांच्या शरीरात गेल्याने गंभीर जखमी होते. कासवावरील उपचार पद्धती गुंतागुंतीची असल्याने डहाणू व ठाणे जिल्ह्यातील ऐरोली येथे उपचार केंद्र आहेत. आता कोकण किनारपट्टीवर कासवांवरील उपचारांसाठी दापोली व रायगडमधील अलिबाग येथे कासव उपचार केंद्र उभारले जाणार असल्याची माहिती विभागीय वनअधिकारी कांचन पवार यांनी दिली.
शहरालगतच्या हॉटेल सावंत पॅलेस येथे कांदळवन प्रतिष्ठान व बॉम्बे नॅचरल हिस्ट्री सोसायटी यांच्या संयुक्त विद्यमाने समुद्रीप्राणी स्टँडिंग उपाययोजना व संवर्धन यासंबंधी मंगळवारी कार्यशाळेचे आयोजन करण्यात आले होते. यावेळी पवार बोलत होत्या. पर्यावरणाचा समतोल व सागरी जैवविविधता अबाधित राखण्यासाठी कांदळवन व समुद्रजीव संवर्धन आज काळाची गरज आहे. हे करत असताना कोणत्याही एका विभागाला शक्य होणार नाही, असे पवार म्हणाल्या. यावेळी कस्टमचे सहाय्यक आयुक्त संदीप कृष्ण, बॉम्बे हिस्ट्री सोसायटीचे संचालक किशोर रिठे, उपविभागीय पोलीस अधिकारी निलेश माईनकर, वन अधिकारी प्रियांका लगड आदी मान्यवर उपस्थित होते.www.konkantoday.com
