नितेश राणेंना मुस्लीम विद्यार्थिनींकडून ओपन चॅलेंज

10 वी आणि 12 वीच्या परीक्षेत बुरखा घालून परीक्षा देण्यास परवानगी नाकारण्यात यावी, अशी मागणी नितेश राणे यांनी शिक्षण मंत्र्यांकडे केली. त्यांच्या या मागणीनंतर मुस्लीम विद्यार्थिनींनी राणेंना ओपन चॅलेंज दिलं आहे.त्यामुळं राज्यात नव्या वादाला तोंड फुटण्याची शक्यता वर्तवण्यात येत आहे.’बुरखा हा आमच्या धर्माचा विषय आहे, आस्थेचा विषय आहे. त्यामुळे आम्ही बुरखा घालूनच परीक्षा देणार’. असं ओपन चॅलेंज नाशिकच्या नांदगाव येथील एच. आर. हायस्कूलच्या इयत्ता दहावीच्या मुस्लीम विद्यार्थिनींनी राणेंना दिलं आहे. तसेच, मंत्री राणे मुद्दाम एका विशिष्ट समाजाला टार्गेट करत आहेत असा गंभीर आरोप करत विद्यार्थिनींनी शालेय शिक्षण मंत्री दादा भुसेंना राणेंविरोधात कारवाई करण्यात विनंती केली.

भिवंडीतील विद्यार्थिनींनीही नितेश राणेंच्या मागणीला विरोध दर्शवला आहे. धर्म आणि शिक्षण हा वेगळा भाग आहे. शासनाने शिक्षणावर भर दिला पाहिजे. ड्रेसवर, हिजाबवर आणि बुरख्यावर जोर देऊन काही होणार नाही. ज्यांना कॉपी करायची आहे ते कसेही कॉपी करतील. भारतात सर्वधर्म समभाव आहे आणि सर्वांना समान अधिकार आहे. त्यामुळे आम्ही ज्या कपड्यात कम्फर्टेबल आहे, त्याच कपड्यांमध्ये आम्ही परीक्षा देऊ शकतो, अशी प्रतिक्रिया भिवंडीच्या विद्यार्थिनींनी दिली आहे.