विद्युत खांबाचे वायरिंग करणारा कामगाराचा तिसऱ्या मजल्यावरून पडून मृत्यू
चिपळूण शहरात विद्युत खांबाचे वायरिंग करणारा कामगार तिसऱ्या मजल्यावरूनन पडून मृत्यू झाल्याची खळबळजनक घटना रविवारी ९ वाजण्याच्या सुमारास शहरातील भोगाळे येथील परशुराम प्लाझा येथे घडली. हा कामगार गंभीर जखमी झाल्याने त्याचा जागीच मृत्यू झाला. याप्रकरणी चिपळूण पोलीस स्थानकात आकस्मिक मृत्यूची नोंद करण्यात आली आहे.रोहन दुर्योधन नेताम (१९, परशुराम प्लाझा, मूळ गाव-गोंदिया) असे मृत्यू झालेल्या कामगाराचे नाव आहे. पोलिसांनी दिलेल्या माहितीनुसार रोहन व इतर कामगार हे शहरातील भोगाळे येथे परशुराम प्लाझा येथे वास्तव्यास होते.
रविवारी रोहन व त्याच्याबरोबर असलेले अन्य कामगार हे दारु पिण्यासाठी बाहेर गेले होते. त्यानंतर ८.३०. वाजण्याच्या सुमारास ते पुन्हा त्यांच्या सदनिकेमध्ये आले. यावेळी रोहन याने, माझा मोबाईल कुठे आहे? असे इतर कामगारांना विचारले असताना त्यातील चांदेश्वर मडावी याने मोबाईल आपल्याकडे असल्याचे रोहन याला सांगितले. हा मोबाईल रोहन याने ताब्यात घेत तो जोरात आपटला. यानंतर तो तिसऱ्या मजल्यावर असलेल्या सदनिकेच्या बाल्कनीत आला व खाली पडला. यातच त्याचा मृत्यू झाला. त्याला उपचारासाठी कामथे रुग्णालयात नेण्यात आले. याबाबतचा अधिक तपास पोलीस हेडकॉन्स्टेबल विनोद आंबेरकर करीत आहेत.
