रत्नागिरीतील महिलेच्या कानावर शस्त्रक्रिया करून डॉक्टरांनी खुलविले चेहर्‍यावर हास्य
रत्नागिरीतील एका ३५ वर्षीय महिलेला वर्षभरापासून ऐकू कमी येण्याचा त्रास होत होता. त्यासाठी तिने खूप सारे औषधोपचार केले. अखेर डेरवण येथील वालावलकर रुग्णालयामध्ये आल्यानंतर तेथील वैद्यकीय चमूने कानातील अतिशय सूक्ष्म अशा हाडाची मायक्रोस्कोपिक शस्त्रक्रिया केली. त्यामुळे महिलेला ऐकू यायला लागल्यानंर तिच्या चेहर्‍यावर हास्य फुलले. अतिशय अवघड अशी शस्त्रक्रिया यशस्वी केल्याबद्दल रुग्णालयाच्या वैद्यकीय पथकाचे कौतुक होत आहे.
सर्वत्र फिरूनही उपयोग न झाल्याने शेवटी या महिलेने वालावलकर रुग्णालयातील कान- घसा विभागातील डॉ. राजीव केणी आणि डॉ. प्रतिक शहाणे यांना दाखवले. तिच्या ऐकू न येण्याचे कानाचा पडदा फाटणे, कानाच्या हाडांमध्ये रोग असणे किंवा वयोमानानुसार नस कमजोर होणे यापैकी एकही कारण नव्हते. तेव्हा डॉक्टरांनी तिच्या ऑडिओमेटी आणि इम्पिडन्स या दोन टेस्ट केल्या. यानंतर असे कळाले की कानाच्या आतील सूक्ष्म हाडे फिक्स झाल्यामुळे तिला ऐकायला येत नाही हे निदान लक्षात येताच डॉक्टरांनी तिला शस्त्रक्रियेचा सल्ला दिला.महिलेने लगेच शस्त्रक्रिया करण्याची तयारी दाखवली.
डॉ. राजीव केणी आणि डॉ. प्रतिक शहाणे यांनी अतिशय कुशलतेने कानातील सूक्ष्म हाडाचे मायक्रोस्कोपिक ऑपरेशन यशस्वी केले. शस्त्रक्रियेनंतर नंतर ऐकू यायला लागल्यामुळे तिच्या चेहर्‍यावर हास्य व समाधान होते, अतिशय अवघड अशी शस्त्रक्रिया यशस्वीरीत्या केल्याबद्दल डॉ. राजीव केणी व डॉ. प्रतीक शहाणे यांचे सर्वत्र कौतुक होत आहे.www.konkantoday.com
