प्रसुतीसाठी बांगलादेशहून माहेरी आलेल्या महिला डॉक्टरची आत्महत्या.

प्रसुतीसाठी बांगलादेश येथून खेडमध्ये माहेरी आलेल्या एक़ा २७ वर्षीय एमबीबीएस डॉक्टर महिलेने शुक्रवारी खेडमधील महाड नाका येथील आपल्या माहेरी गळफास घेवून आत्महत्या केल्याची घटना घडली आहे. त्या डॉक्टर महिलेला सहा महिन्यांची मुलगीदेखील आहे. तिने आत्महत्या करण्याचे कारण समजू शकले नाही.पोलिसांनी दिलेल्या माहिती नुसार तसलीमा महमद युनूस (२७) असे गळफास घेवून आत्महत्या केलेल्या महिलेचे नाव आहे. तसलीमा हिचा विवाह महमद युनूस याच्यासोबत पाच वर्षापूर्वी झाला होता. लग्नानंतर तसलीमा ही बांगलादेश येथे आपल्या सासरी राहत होती. ती पेशाने डॉक्टर असून तिच्या पतीचा बांगलादेश येथे हॉटेल व्यवसाय आहे.

ती गरोदर असल्याने एप्रिल २०२४ रोजी ती आपल्या गावी माहेरी खेडमध्ये आली. १४ जुलै २०२४ ला तिची प्रसुती झाली आणि तिला मुलगी झाली. शुक्रवार दि. १० जानेवारी रोजी दुपारी २ वाजण्याच्या दरम्यान तिने खेड शहरातील महाड नाका येथे आपल्या राहत्या घरी ओढणीने गळफास घेवून आत्महत्या केली. त्याबाबतीत तिचा सख्खा भाऊ सुरज जाहिरूद्दीन शिकलगार याने खेड पोलीस ठाण्यात खबर दिली आहे. त्यानुसार तसलीमा युनूस हिची आकस्मिक मृत्यू म्हणून नोंद करण्यात आली आहे.www.konkantoday.com