प.पू.गुरुमाऊली आण्णासाहेब मोरे यांच्या दिव्य सान्निध्यात रत्नागिरीत १ एप्रिलला महासत्संग सोहळा विश्वशांती आणि राष्ट्रहितासाठी बहुविध उपक्रमांचे आयोजन

रत्नागिरी : दिंडोरी प्रणीत अखिल भारतीय श्री स्वामी समर्थ सेवामार्गातर्फे परमपूज्य गुरुमाऊली श्री. आण्णासाहेब मोरे यांच्या दिव्य सान्निध्यात विश्वशांती तसेच देश, धर्म आणि समाजाच्या हितासाठी रत्नागिरीत मंगळवार दि. १ एप्रिल २०२५ रोजी राष्ट्रीय महासत्संग सोहळा आयोजित करण्यात आला आहे.या कार्यक्रमामुळे कोकण आणि गोव्यातील सेवेकऱ्यांमध्ये उत्साहाचे वातावरण निर्माण झाले आहे.

रत्नागिरीच्या साळवी स्टॉप येथील स्टेट बँक कॉलनी जवळील नवीन ट्रक वाहन तळ मैदानावर हा आध्यात्मिक कार्यक्रम होत आहे. महासत्संग सोहळ्यानिमित्त याच मैदानावर १ एप्रिल रोजी सायंकाळी ४ ते ५ या वेळेत विश्वशांतीसाठी श्री स्वामी चरित्र सारामृत ग्रंथाचे सामूहिक पारायण आणि त्यानंतर कोकणच्या समृद्धीसाठी सायंकाळी ५ ते ६ या वेळेत श्रीचक्रराज श्रीयंत्र पूजनाची सेवा होईल. या दोन्ही सेवा झाल्यानंतर समस्त सेवेकऱ्यांच्या वतीने परमपूज्य गुरुमाऊलींचा अभीष्टचिंतन सोहळा देखील साजरा करण्यात येणार आहे. त्यानंतर परमपूज्य गुरुमाऊली श्री. आण्णासाहेब मोरे यांचे अमृततुल्य हितगुज होईल.

संपूर्ण कोकण आणि गोवा विभागातील सेवेकरी कार्यक्रमासाठी योगदान देत असून कार्यक्रमाची जय्यत तयारी सुरू आहे. कार्यक्रमाची माहिती देणारे फ्लेक्स मुंबई-गोवा महामार्गाच्या दुतर्फा आणि कोकणातील वेगवेगळ्या शहरांमध्ये उभारण्यात येत आहेत. कोकणातील हजारो सेवेकरी कार्यक्रमाचा जोरदार प्रचार-प्रसार करण्यात मग्न आहेत. घराघरात जाऊन प्रचार पत्रकांचे वाटपही सुरू आहे. तब्बल एका तपानंतर सेवेकऱ्यांचे श्रद्धास्थान परमपूज्य गुरुमाऊली श्री. मोरे यांचे कोकणात आगमन होत असल्यामुळे सेवेकऱ्यांमध्ये उत्साह निर्माण झाला आहे. तरी जास्तीत जास्त सेवेकर्‍यांनी विश्वशांती ,राष्ट्रहित आणि समाजकल्याणासाठी आयोजित करण्यात आलेल्या रत्नागिरी येथील महासत्संग व अध्यात्मिक सेवेत मोठ्या संख्येने सहभागी होऊन योगदान द्यावे असे आवाहन करण्यात आले आहे. गुरुमाऊली श्री मोरे यांच्या अमृततुल्य हितगुजानंतर प्रसाद वाटप होऊन कार्यक्रमाची सांगता होईल.