करोडपती झाला विश्विविजेता गुकेश, जागतिक बुद्धिबळ स्पर्धा जिंकल्यानंतर किती मिळाली बक्षिसाची रक्कम?

भारताचा ग्रँडमास्टर डी गुकेशने ऐतिहासिक कामगिरी करत जागतिक बुद्धिबळ स्पर्धा जिंकणारा सर्वात युवा खेळाडू ठरला आहे. गुरुवारी १४व्या आणि अंतिम सामन्यात गतविजेत्या चीनच्या डिंग लिरेनला पराभूत करून वयाच्या १८व्या वर्षी सर्वात तरुण जागतिक बुद्धिबळ चॅम्पियन बनला. या वर्षाच्या सुरुवातीला कँडिडेट्स टूर्नामेंट जिंकल्यानंतर गुकेश हा जागतिक विजेतेपदासाठी आव्हान देणारा सर्वात तरुण खेळाडू ठरला. गुकेशला वर्ल्ड चॅम्पियन ठरल्यानंतर किती बक्षिसाची रक्कम मिळाली,

जागतिक बुद्धिबळ चॅम्पियनशिप ही क्रीडा जगतात सर्वाधिक बक्षीस रक्कम असलेल्या चॅम्पियनशिपपैकी एक आहे. या चॅम्पियनशिपची बक्षीस रक्कम २.५ दशलक्ष डॉलर्स म्हणजेच अंदाजे २१ कोटी रुपये आहे.बुद्धिबळची आंतरराष्ट्रीय संघटना FIDE च्या नियमांनुसार, अंतिम सामना खेळणाऱ्या खेळाडूंना प्रत्येक सामना जिंकण्यासाठी २० हजार डॉलर्स म्हणजेच अंदाजे १.६९ कोटी रुपये मिळतात. तर उर्वरित रक्कम दोन्ही खेळाडूंमध्ये समान प्रमाणात विभागली जाते.डी गुकेशने चॅम्पियनशिपमध्ये तीन सामने जिंकले होते. त्याने तिसरा, ११वा आणि शेवटचा सामना जिंकला. यासाठी त्याला ६० हजार डॉलर म्हणजेच ५.०७ कोटी रुपये मिळाले. तर लिरेनने दोन सामने जिंकले आहेत ज्यासाठी त्याला ३.३८ कोटी रुपये मिळाले आहेत. उरलेली रक्कम दोघांमध्ये समान प्रमाणात विभागली गेली. म्हणजेच गुकेशला एकूण १.३५ मिलियन डॉलर्स म्हणजेच ११.४५ कोटी रुपये तर लिरेनला १.१५ मिलियन डॉलर्स म्हणजेच ९.७५ कोटी रुपये मिळाले आहेत.

डी गुकेश हा विश्वनाथन आनंद यांच्यानंतर बुद्धिबळ विश्वविजेता ठरलेला दुसरा भारतीय खेळाडू आहे. १४व्या डावात गुकेशचे गण ७.५ तर लिरेनचे ६.५ होते. अखेरच्या क्षणी डिंग लिरेनने मोठी घोडचूक केली, गुकेशला त्याची चूक कळताच त्याच्या चेहऱ्यावर मोठं हसू उमटलं आणि तो खुर्चीवरून उठून मागे गेला. लिरेनला त्याची चूक उमगल्यावर तोही बिथरला आणि थोड्यावेळाने त्याने हात मिळवत माघार घेतली आणि डी गुकेश सर्वात तरूण विश्वविजेता बुद्धिबळपटू ठरला.